ہانگ کانگ اچ رہائشی عمارت اچ ٻھاہ لگݨ پاروں ہلاکتاں دی تعداد 44 تھی ڳئی، 100 زخمی، 279 لوک لاپتہ

بیجنگ۔ 27 نومبر (اے پی پی) چین دے شہر ہانگ کانگ اچ رہائشی عمارت اچ ٻھاہ لگݨ پاروں ہلاکتاں دی تعداد 44 تھی ڳئی اے جݙاں جو 100 لوک زخمی اَتے 279 لاپتہ ہن۔ اے پی اَتے اے ایف پی دے مطابق ہانگ کانگ دے چیف ایگزیکٹیو جان لی ݙسیا جو 279 لوک لاپتہ ہن جݙاں جو 100 زخمی لوکاں اچوں 45 توں ودھ لوکاں دی حالت تشویشناک ݙسائی ویندی پئی اے۔ مقامی پولیس مرمت دے کم دے ذمہ وار ٹھیکیدار ادارے دے ݙو سینئر عہدیداراں اَتے ہک انجینئر کوں حراست اچ ڳھن ڳھدے۔ پولیس دے مطابق عمارت دی مرمت دے دوران استعمال تھیوݨ آلا مواد فائر سیفٹی دے معیار تے پورا نہ لہندا ہئی، جئیں پاروں ٻھاہ جلدی کھنڈ ڳئی۔ ٻھاہ نیو ٹیریٹریز دے علاقے تائی پو اچ واقع وانگ فک کورٹ کمپلیکس اچ لڳی، جیڑھا جو اُچی عمارتاں دا ہک سلسلہ اے۔ شعلے بانس دے اسکیفولڈنگ تئیں پڄ ڳئے جیڑھا عمارت دی بیرونی تزئین تے آرائش کیتے لاتا ڳیا ہئی۔ ایں کمپلیکس اچ تقریباً 2,000 اپارٹمنٹس اَتے 4,000 دے نیڑے رہائشی موجود ہن۔