حکومت متحرک اَتے جامع کیپٹل مارکیٹس دی تشکیل کیتے پرعزم اے، وزیر خزانہ سینیٹر محمد اورنگزیب

اسلام آباد۔ 28 نومبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو معاشی ترقی کیتے مالی معاونت فراہم کرݨ، سرمایہ کاراں دی شمولیت ودھاوݨ اَتے جاری ڈھانچہ جاتی اصلاحات کوں اڳُوں ودھاوݨ اچ کلیدی کردار ادا کرݨ کیتے حکومت متحرک اَتے جامع کیپٹل مارکیٹس دی تشکیل کیتے پرعزم اے۔ انہاں اِے ڳالھ جمعہ کوں اتھاں کیپٹل مارکیٹ ڈویلپمنٹ کونسل دے افتتاحی اجلاس نال خطاب کریندے ہوئیں کیتی۔ وزیر خزانہ آکھیا جو جدید، مربوط اَتے سرمایہ کار دوست کیپٹل مارکیٹ ایکو سسٹم دی ترقی قومی ترجیح اے جیڑھا فنانس تئیں بہتر رَسائی، بچتاں دے فروغ، مارکیٹ سرگرمی اچ گہرائی اَتے پاکستان دی طویل مُدت دی معاشی مضبوطی کیتے بہوں ضروری اے۔ اجلاس اچ پاکستان دی کیپٹل مارکیٹس دے استحکام اَتے توسیع دے روڈ میپ دا تفصیلی جائزہ گھدا ڳیا۔ اجلاس اچ اہم مالیاتی اداریاں، کارپوریٹ سیکٹر، ریگولیٹرز اَتے مُختلف سرکاری شعبیاں دی اعلیٰ قیادت شرکت کیتی جئیں اچ سیکورٹیز اینڈ ایکسچینج کمیشن، سٹیٹ بینک، پاکستان بینکس ایسوسی ایشن، پاکستان سٹاک ایکسچینج، سینٹرل ڈیپازٹری کمپنی، نیشنل کلیئرنگ کمپنی، پاکستان بزنس کونسل اَتے وزارتِ خزانہ دے نمائندے شامل ہن۔اجلاس اچ کونسل دے آپݨے ضوابطِ کار اَتے کیپٹل مارکیٹ دی ترقی دے مجموعی منصوبے اَتے حکمتِ عملی دا جائزہ گھدا ڳیا اَتے مارکیٹ کوں وسعت ݙیوݨ، ایںکوں گہرا کرݨ اَتے توسیع ݙیوݨ کیتے عالمی بہترین طریقیاں اَتے منظم طریقہ ہائے کار کوں اپناوݨ تے زور ݙتا ڳیا۔اجلاس اچ کیپٹل مارکیٹس دے کراس بارڈر انضمام دے تقاضیاں، مارکیٹ ٹیکنالوجیز دے ان لائنمنٹ، ریگولیٹری جدیدکاری اَتے اجراء کرݨ آلیاں کوں قرض اَتے ایکویٹی ݙوہیں مارکیٹس دے ذریعے سرمایہ ودھاوݨ دی ترغیب ݙیوݨ دی ضرورت دا وی جائزہ گھدا ڳیا۔ وزیر خزانہ کونسل تے زور ݙتا جو او نجی شعبے دی شمولیت اچ رکاوٹاں دی نشاندہی اَتے خاتمہ کرے۔ وزیر خزانہ آکھیا جو ٹیکسیشن کیپٹل مارکیٹ دی کشش تے اثر انداز تھیوݨ آلا ہک اہم عنصر اے۔ انہاں ہدایت کیتی جو ٹیکس پالیسی آفس، سٹیٹ بینک، ایس ای سی پی، ڈی ایم او اَتے وزارتِ خزانہ سانجھے طور تے کیپٹل مارکیٹ دے ٹیکس نظام، اجراء کرݨ آلیاں کیتے ٹیکس مراعات اَتے وسیع تر لسٹنگز اَتے ودھ شفافیت کوں فروغ ݙیوݨ دے اقدامات دا جائزہ ڳھنن۔ اجلاس کوں ݙسایا ڳیا جو انہاں اقدامات دا مقصد ہک متحرک، لچکدار اَتے ودھ لیکویڈیٹی رکھݨ آلا کیپٹل مارکیٹ ایکو سسٹم قائم کرݨ اے، جیڑھا بچتاں کوں پیداواری سرمایہ کاری دی سِمَت منتقل کرے، معاشی ترقی اچ معاون ہووے، اَتے پاکستان دی مجموعی مالی استحکام کوں مضبوط بݨاوے۔