نائب وزیراعظم و وزیر خارجہ اسحاق ڈار دا اقتصادی تعاون تنظیم دے کونسل آف وزراء (ای سی او سی او ایم) دے اجلاس اچ خطاب

اسلام آباد۔ 28 نومبر(اے پی پی) نائب وزیراعظم و وزیر خارجہ اسحاق ڈار دا اقتصادی تعاون تنظیم دے کونسل آف وزراء (ای سی او سی او ایم) دے اجلاس اچ شرکت کیتی اے۔ اپݨے خطاب اچ انہاں آکھیے جو علاقائی رابطہ کاری اتے اقتصادی ترقی کیتے دہشت گردی سب توں وݙی رکاوٹ اے اتے دہشت گردی دے نال نال، موسمیاتی تبدیلی وی ہک مشترکہ چیلنج اے، اجتماعی طور تے مشترکہ چیلنجز دا سامݨا کرݨا، معاشی خلیج کوں عبور کرݨا اَتے مشترکہ خوشحالی دے امکانات کوں کھولݨا پہلے توں کتھائیں ودھ اہم اے، ساکوں اقتصادی تعاون تنظیم کوں مزید مستحکم کرݨ دی لوڑھ اے تاں جو اے مقاصد پورے کیتے ونڄ سڳن۔ نائب وزیراعظم و وزیر خارجہ آکھیا جو اے اجلاس عالمی اَتے علاقائی جغرافیائی سیاسی تبدیلیاں اَتے تکنیکی ترقی دی تیزی نال بدلدی ہوئی صورتحال اچ تھیندا پئے جیڑھی علاقائی تعاون کوں متاثر کریندی پئی اے، اڄ دی ایں غیر یقینی دنیا اچ اجتماعی طور تے مشترکہ چیلنجز دا سامݨا کرݨا، معاشی خلیج کوں عبور کرݨا اَتے مشترکہ خوشحالی دے امکانات کوں کھولݨا پہلے توں ودھ اہم اے۔ انہاں آکھیا جو 29ویں ای سی او سی او ایم دا مرکزی موضوع “علاقائی نقل و حمل دی رابطہ کاری اَتے پائیدار ترقی کوں اڳُوں ودھاوݨا” بروقت اقدام اے اَتے ای سی او دے وژن دے مطابق اے۔ نائب وزیراعظم و وزیر خارجہ آکھیا جو اساں اسلام آباد-تہران-استنبول ریل راہداری کوں مکمل طور تے فعال بݨاوݨ چاہندے ہیں اَتے ایںدے جلدی احیاء کیتے ایران اَتے ترکی نال رَل تے کم کریندے پئے ہیں، اساں یوریشین ملٹی ماڈل نال وی جُڑ چُکیے ہیں جیںدے نال اساݙیاں بندرگاہیں یوریشیائی ہارٹ لینڈ نال جُڑدیاں پئن اَتے اساں ازبکستان توں افغانستان دے رستے پاکستان تئیں ریل رستیاں دے قیام دے وی تانڳھی ہیں جیڑھا وسط ایشیائی خطے کیتے ٻہوں ضروری اے اتے ٹرانزٹ دے مواقع ݙیسی اَتے ترقی اَتے علاقائی استحکام کوں فروغ ݙیسی۔ انہاں آکھیا جو ٹرانزٹ ٹرانسپورٹ فریم ورک معاہدے (ٹی ٹی ایف اے) دے مکمل نفاذ، ہَم آہنگ ملٹی ماڈل نقل و حمل دے نیٹ ورک دی ترقی، صلاحیت دی تعمیر اَتے ٹیکنالوجی دی منتقلی دے ذریعے کسٹم اَتے سرحدی طریقہ کار کوں سوکھا بݨاوݨا اَتے ہَم آہنگ کرݨا اَتے اساݙیاں بین الاقوامی ماحولیاتی ذمہ واریاں دے مطابق پائیدار اَتے موسمیاتی تبدیلیاں دے خلاف نقل و حمل دے نظام دا ودھارا ضروری اے، علاقائی رابطہ کاری دے خواب کوں سچ کرݨ کیتے امن و سلامتی دا ماحول پیدا کرݨا ہوسی، ای سی او وژن کیتے رُکن ملکاں دی اجتماعی کوششاں کرݨیاں ہوسن تاں جو ساݙے خطے کوں پیش آوݨ آلے سنگین سلامتی دے چیلنجز نال نِمٹیا ونج سڳے۔ ای سی او رُکن ملکاں کوں خطے اچ اقتصادی تعاون دی مضبوط بنیاد رکھݨ کیتے دہشت گردی دا اجتماعی طور تے مقابلہ کرݨا ہوسی۔ انہاں سارے شرکاء کوں پاکستان دے دورے دی بھرپور دعوت ݙیندے ہوئیں آکھیا جو اساں آوݨ آلے سال ای سی او سی او ایم دے 30ویں اجلاس کیتے تہاݙا ساریاں دا پاکستان اچ خیرمقدم کرݨ دے تانڳھی ہیں، آؤ رَل تے سارے چیلنجز تے قابو پاوݨ اَتے آپݨے پُورے خطے اَتے ایں توں اڳُوں امن، ترقی اَتے خوشحالی دے بہتر مستقبل دی تعمیر کیتے رَل تے کم کروں۔