چیئرمین سینیٹ سید یوسف رضا گیلانی دی پی پی پی دے 58ویں یومِ تاسیس تے مبارخ

اسلام آباد۔ 30 نومبر(اے پی پی) چیئرمین سینیٹ سید یوسف رضا گیلانی پاکستان پیپلز پارٹی دے 58ویں یومِ تاسیس دے موقع تے پارٹی دی قیادت، کارکناں اَتے جِیالُیں کوں دِلوں مبارخ ݙیندے جمہوریت دے استحکام اَتے عوامی حقوق دے تحفظ کیتے پیپلز پارٹی دے تاریخی کردار کوں شاندار لفظاں اچ خراجِ تحسین پیش کیتے۔ سینیٹ سیکرٹریٹ توں جاری بیان اچ چیئرمین سینیٹ آکھیے جو پاکستان پیپلز پارٹی، جیڑھی شہید ذوالفقار علی بھٹو دی ولولہ انگیز قیادت اچ قائم تھئی اَتے شہید محترمہ بینظیر بھٹو دی جدوجہد اَتے عظیم قربانیاں نال مضبوط تھئی، ہمیشہ جمہوری استقامت دی علامت رہی اے۔چیئرمین سینیٹ آکھیا جو پیپلز پارٹی ہر دور اچ آئین دی بالادستی، انسانی حقوق دے تحفظ اَتے جمہوری قدراں دے ودھارے اچ صفِ اوّل دا کردار ادا کیتے۔ سید یوسف رضا گیلانی صدرِ مملکت آصف علی زرداری دے اہم کردار کوں وی سراہیا جنہاں ہک نازک دور اچ مفاہمت دی پالیسی اختیار کریندے آئین دی بحالی، پارلیمان دے استحکام اَتے جمہوری عمل کوں مضبوط کیتا۔ انہاں آکھیا جو صدر زرداری دی بُردباری اَتے سیاسی بصیرت مُلک کوں سیاسی ہم آہنگی اَتے ادارہ جاتی استحکام دے طرف ٹوریا۔چیئرمین سینیٹ چیئرمین بلاول بھٹو زرداری دی متحرک قیادت کوں وی خراجِ تحسین پیش کیتا۔ انہاں آکھیا جو بلاول بھٹو زرداری پارٹی اچ نویں توانائی، جدید وژن اَتے نوجواناں دی شمولیت کوں ودھارا ݙتے۔ انہاں دی خارجہ پالیسی، نوجواناں دے حقوق اَتے جامع ترقی کیتے کوششاں پیپلز پارٹی دے مستقبل بین کردار دی عکاس ہِن۔سید یوسف رضا گیلانی پیپلز پارٹی دی تریمتاں دے حقوق، مزدوراں دے مفادات اَتے شمولیتی طرزِ حکمرانی کیتے مسلسل جدوجہد دا ذکر کریندے آکھیا جو پارٹی دا ترقی پسند ایجنڈا اَتے سماجی انصاف دا وژن دیرپا اصلاحات دی بنیاد اے۔ انہاں آکھیا جو پیپلز پارٹی ہمیشہ محروم طبقیں دے حقوق دا دفاع کیتے اَتے سخت ترین حالات اچ وی جمہوری اصولاں دا علم بُلند رکھیا اے۔چیئرمین سینیٹ ایں عزم دا اعادہ کیتا جو جمہوری اداریں دے استحکام اَتے ہک پُرامن، خوشحال اَتے ترقی پسند پاکستان کیتے کوششاں جاری رہِسَن۔ چھیکڑ اچ سید یوسف رضا گیلانی پارٹی قیادت اَتے کارکناں کوں یومِ تاسیس دی مبارخ ݙیندے ایں یقین دا اظہار کیتا جو پاکستان پیپلز پارٹی مستقبل اچ وی جمہوریت دے ودھارے، بنیادی حقوق دے تحفظ اَتے قومی یکجہتی دے استحکام اچ آپݨا بھرپور کردار ادا کریندی رہسی