پاکستان اَتے مصر وچال تجارتی اَتے معاشی رابطیں کیتے نویں پاکستان-مصر بزنس کونسل قائم کیتی ویسی، اسحاق ڈار دی مصری وزیر خارجہ دے نال مشترکہ پریس کانفرنس

اسلام آباد۔ 30 نومبر (اے پی پی) نائب وزیراعظم و وزیرِ خارجہ سینیٹر محمد اسحاق ڈار آکھیے جو پاکستان اَتے مصر وچال تجارتی اَتے معاشی رابطیں کوں ودھاوݨ کیتے نویں پاکستان-مصر بزنس کونسل قائم کیتی ویسی تاں جو ݙو طرفہ تعاون کوں ادارہ جاتی شکل ݙتی ونڄ سڳے اَتے سانجھے مفادات تے مبنی تجارتی سرگرمیاں اَتے کاروباری رابطیں کوں مضبوط بݨایا ونڄے۔مصری وزیرِخارجہ ڈاکٹر بدر احمد محمد عبدالعاطی نال مشترکہ پریس کانفرنس نال خطاب کریندے انہاں ݙسیا جو ہک پاکستان-مصر بزنس فورم وی قائم کیتا ویسی، جیں دی مشترکہ طور تے ݙوہیں وزرائے خارجہ سربراہی کریسن، اَتے ایں دا پہلا اجلاس 2026 دی ݙوجھی سہ ماہی اچ قاہرہ اچ منعقد تھیسی۔اسحاق ڈار آکھیا جو ݙوہیں ملکاں وچال موجودہ تقریباً 300 ملین ڈالر دی تجارت انہاں دے آپت دے تعلقات دی گہرائی موجب کائنی۔ انہاں ݙسیا جو پاکستان ولوں مختلف شعبیں دی نمائندگی کرݨ آلے250 کاروباری اداریں دی فہرست بݨائی ویسی جنہاں کوں ݙو طرفہ تجارت اَتے سرمایہ کاری ودھاوݨ کیتے سہولتاں ݙتیاں ویسن اَتے بعد اچ انہاں کوں مصر اچ وائٹ لسٹ اچ شامل کیتا ویسی۔ انہاں اے وی ݙسیا جو بزنس کمیونٹی کیتے ویزا سہولت اچ وی بہتری گھن آئی ویسی اَتے چھی مہینے بعد مزید 250 اداریں دی فہرست شامل کرتے مجموعی تعداد500 کر ݙتی ویسی۔ مصری وزیرِ خارجہ وی آپݨی ولوں ایہوں جہیں فہرست تیار کرݨ تے اتفاق کیتے۔