محسن نقوی دا ٹی چوک فلائی اوور، شاہین چوک انڈر پاس اَتے فیض آباد انٹرچینج منصوبیں دا دورہ

اسلام آباد۔ 30 نومبر(اے پی پی) وفاقی دارالحکومت دے تریجھے وݙے انفراسٹرکچر منصوبے ٹی چوک فلائی اوور، شاہین چوک انڈر پاس اَتے فیض آباد انٹرچینج دی ری ماڈلنگ تکھے تکمیل دے پاسے ودھدے پئن اَتے تعمیری کم چھیکڑٰ مرحلیں اچ ہے۔وفاقی وزیر داخلہ محسن نقوی ترائی منصوبیں دا دورہ کریندے کم دی رفتار اَتے معیار تے اطمینان ظاہر کیتا اَتے ہدایات ݙتیاں جو منصوبیں کوں ویلھے سِر پورا کرݨ کیتے سارے دستیاب وسیلے استعمال کیتے ونڄن۔ فیض آباد تے ٹریفک دے وہݨ اچ مزید بہتری کیتے انہاں لوپ 1 اَتے لوپ 2 کوں تریجھے لین تئیں ودھاوݨ دی ہدایت کیتی اَتے منصوبیں دے آسے پاسے لینڈ سکیپنگ اَتے لائٹنگ لاوݨ دا حکم ݙتا۔وزیر داخلہ آکھیا جو انہاں منصوبیں دے پُورے تھیوݨ نال ٹریفک دی روانی بہتر تھیسی، رَش گھٹ آسی اَتے روزانہ سفر کرݨ آلی عوام کوں اہم سہولت مِلسی۔چیئرمین سی ڈی اے محمد علی رندھاوا وفاقی وزیر کوں بریفنگ ݙیندے ݙسیا جو ٹی چوک فلائی اوور 80 فیصد مکمل تھی چُکیے اَتے دسمبر دے شروع اچ ٹریفک کیتے کھول ݙتا ویسی۔ شاہین چوک انڈر پاس اَتے فیض آباد انٹرچینج تے وی کم تسلی بخش اے۔