وزیر اعظم دی ترقیاتی منصوبیاں دے مختلف مرحلیاں اچ اصلاحات دے حوالے نال جامع حکمت عملی ترتیب ݙیوݨ دی ہدایت

اسلام آباد۔ 8 دسمبر(اے پی پی)وزیر اعظم محمد شہباز شریف ترقیاتی منصوبیاں دے مختلف مرحلیاں اچ اصلاحات دے حوالے نال جامع حکمت عملی ترتیب ݙیوݨ دی ہدایت کریندے آکھیے جو قومی اہمیت دے اہم منصوبیاں دی شفافیت نال ویلھے سر تکمیل حکومت دی ترجیح اے، وفاقی اَتے صوبائی حکومتاں دے سٹیک ہولڈرز دی سٹیئرنگ کمیٹی دی صدارت آپ کریساں۔ انہاں اے ڳالھ اسلام آباد اچ اپݨی اڳواݨی اچ ترقیاتی منصوبیاں دی ویلھے سر تکمیل بارے لائحہ عمل ݙیوݨ کیتے جائزہ اجلاس نال خطاب اچ آکھی۔ اجلاس اچ وفاقی وزیر قانون و انصاف اعظم نذیر تارڑ، وفاقی وزیر موسمیاتی تبدیلی مصدق ملک، وفاقی وزیر اقتصادی امور احد خان چیمہ، وفاقی وزیر خزانہ اَتے محصولات محمد اورنگزیب، وفاقی وزیر اطلاعات تے نشریات عطاء اللہ تارڑ، وفاقی وزیر انفارمیشن ٹیکنالوجی تے ٹیلی کام شزا فاطمہ، وفاقی وزیر پاور ݙویژن سردار اویس خان لغاری، وزیر پیٹرولیم علی پرویز ملک، وفاقی وزیر ریلوے حنیف عباسی، عالمی بینک، ایشیائی ترقیاتی بینک دیاں کنٹری ݙائریکٹرز سودھا متعلقہ سرکاری افسراں شرکت کیتی۔ وزیر اعظم ترقیاتی منصوبیاں دے مختلف مرحلیاں اچ اصلاحات دے حوالے نال جامع حکمت عملی ترتیب ݙیوݨ دی ہدایت کریندے ہوئیں آکھیا جو ترقیاتی منصوبیاں اچ اصلاحات دے حوالے نال وفاقی اَتے صوبائی حکومتاں دے سٹیک ہولڈرز دی سٹیئرنگ کمیٹی دی صدارت او خود کریسن۔ انہاں ترقیاتی منصوبیاں کیتے اصلاحات اچ مدد کرݨ تے سانجھے داراں، عالمی بینک اَتے ایشیائی ترقیاتی بینک دا شکریہ ادا کیتا۔ اجلاس کوں عالمی بینک اَتے ایشیائی ترقیاتی بینک ولوں ترقیاتی منصوبیاں دی ویلھے سر تکمیل دے حوالے نال مشورے ݙتے ڳئے۔ اجلاس کوں بریفنگ اچ ݙسایا ڳیا جو ترقیاتی منصوبیاں کیتے انسانی وسیلیاں کوں منصوبیاں دے مقصد نال ہم آہنگ کرݨ دی لوڑھ اے، ترقیاتی منصوبیاں دی تکمیل کوں پی ایس ݙی پی اَتے اے ݙی پی دے مقصداں اَتے امنگاں نال ہم آہنگ کرݨا ہوسی، ویلھے سر پروکیورمنٹ نہ تھیوݨ ترقیاتی منصوبیاں اچ دیر دی بنیادی وجہ اے، ای-پروکیورمنٹ اَتے پراجیکٹ ریڈی نیس دیاں سہولتاں ݙیوݨ نال پروکیورمنٹ کوں تکھی رفتار ݙتی ونڄ سڳدی اے، ترقیاتی منصوبیاں دی تکمیل اچ منظوری دے کئی مرحلے شامل ہوندن جیکوں سوکھا بݨاوݨ دی لوڑھ اے۔ اجلاس اچ اصلاحات دے حوالے نال چار ورکنگ گروپس بݨاوݨ دی تجویز زیر غور آئی، پہلا ورکنگ گروپ ترقیاتی منصوبیاں دے منظوری دے مرحلیاں اَتے تیاری دے حوالے نال اصلاحات تے کم کریسی، ݙوجھا ورکنگ گروپ پروکیورمنٹ کوں جدید اَتے شفاف خطوط تے قائم کرݨ دے حوالے نال اصلاحات تے اَتے تریجھا ورکنگ گروپ منصوبیاں کیتے زمین گھِنݨ اَتے ری-سیٹلمنٹ دے معاملیاں اچ اصلاحات گھِن آوݨ دے حوالے نال ہوسی، جݙاں جو چوتھا ورکنگ گروپ ترقیاتی منصوبیاں دے حوالے نال انسانی وسیلیاں اَتے سٹاف دی تعیناتی دے حوالے نال اصلاحات تے کم کریسی۔