پاکستان سپر لیگ (پی ایس ایل) کوں دنیا دی نمبر ون ٹی 20 لیگ بݨاوݨ بنیادی مشن اے، محسن نقوی

لندن۔ 8 دسمبر (اے پی پی)پاکستان کرکٹ بورڈ (پی سی بی) دے چیئرمین محسن نقوی آکھیے جو پاکستان سپر لیگ (پی ایس ایل) کوں دنیا دی نمبر ون ٹی 20 لیگ بݨاوݨ انہاں دا بنیادی مشن اے جیںدے کیتے ملکی کرکٹ انفراسٹرکچر کوں عالمی معیار دے مطابق ڈھالیا ویندا پئے۔ انہاں اعلان کیتا جو اسلام آباد اچ جدید ترین، عالمی سہولتاں نال بھریا ہویا کرکٹ سٹیڈیم بݨایا ویسی جݙاں جو مظفرآباد اچ وی بین الاقوامی معیار دا نواں کرکٹ سٹیڈیم بݨایا ویسی۔ او لاڑݙز کرکٹ گراؤنڈ اچ تھیوݨ آلے تاریخی پی ایس ایل لندن روڈ شو نال خطاب کریندے پئے ہن۔ انہاں ݙسیا جو پی ایس ایل کوں لمیٹڈ کمپنی بݨاوݨ دی منظوری دے بعد اوکوں مارکیٹ اچ گھن آوݨ کیتے آئی پی او وی جاری کیتا ویسی۔ انہاں دا آکھݨ ہا جو دسمبر توں پی ایس ایل 11 دے آغاز تئیں ملک بھر دے سارے وینیوز تے کرکٹ شائقین کیتے خصوصی کنسرٹس کیتے ویسن تاں جو لیگ کوں عالمی سطح تے مزید اڳونہا کیتا ونڄے۔ چیئرمین پی سی بی آکھیا جو پی ایس ایل ہݨ ھک پکا بین الاقوامی برانݙ دے طور تے سامݨے آندا پئے اَتے ایںدی عالمی براڈکاسٹ رسائی اچ ودھارے تے خصوصی توجہ ݙتی ویندی پئی اے۔ ایں سانڳے پی ایس ایل دے انٹرنیشنل میڈیا رائٹس دا نواں ٹینݙر جاری کر ݙتا ڳئے جݙاں جو پی سی بی او ٹی ٹی پلیٹ فارم PCB Live وی لانچ کر ݙتے۔ محسن نقوی ٹورنامنٹ دے انعامی ڈھانچے بارے ݙسایا جو پی ایس ایل 11 دی جِیتݨ آلی ٹیم کیتے 5 لکھ ڈالر جݙاں جو رنرز اپ ٹیم کیتے 3 لکھ ڈالر دا انعام مقرر کیتا ڳیا اے۔ بہترین کرکٹ ݙیولپمینٹ کرݨ آلی فرنچائز کوں 2 لکھ ڈالر ݙتے ویسن۔ انہاں دا آکھݨ ہا جو پی ایس ایل اچ سرمایہ کاراں کیتے وݙے موقع موجود ہِن اَتے ایں حوالے نال چنڳی پیش رفت جاری اے۔ روڈ شو دے دوران تھیوݨ آلی پینل ݙسکشن اچ لیجنݙری کرکٹر وسیم اکرم، سابق چیئرمین پی سی بی رمیز راجہ اَتے چیف ایگزیکٹو آفیسر پی ایس ایل سلمان نصیر وی شریک ہن