حکومت ٹیکس چوری دے خلاف بھرپور ایکشن گھنسی، جاری مالی سال ٹیکس وصولیاں اچ 10.3 فیصد ودھارا تھئے، وزیر خزانہ محمد اورنگزیب دا قومی اسمبلی اچ جواب

اسلام آباد۔ 8 دسمبر(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو حکومت ٹیکس چوری دے خلاف بھرپور ایکشن گھنسی، جاری مالی سال ٹیکس وصولیاں اچ 10.3 فیصد ودھارا تھئے۔ آئی ایم ایف رپورٹ دیاں 15 سفارشات اچوں ٻہوں ساریاں تے حکومت پہلے توں کم کریندی پئی اے۔ قومی اسمبلی دے اجلاس اچ ٹیکس چوری اَتے محاصل اچ گھٹکی دے حوالے نال سید حفیظ الدین اَتے محمد جاوید حنیف دے توجہ ݙیوائو نوٹس تے وفاقی وزیر خزانہ ایوان کوں ݙسایا جو گزریل مالی سال دے دوران ایف بی آر دے محاصل دا حجم 11.7 ٹریلین روپے ہا جیڑھا ایں توں پچھلے مالی سال ڳھدے ڳئے محاصل توں 2.5 ٹریلین روپے ودھ ہا۔ گزریل سال ایف بی آر دے محاصل وچ مجموعی طور تے 27 فیصد ودھارا تھیا ہا۔ گزریل مالی سال اچ انکم ٹیکس وچ 28 فیصد، سیلز ٹیکس 26فیصد، فیڈرل ایکسائز ݙیوٹی وچ 33 فیصد اَتے کسٹم ݙیوٹی وچ16 فیصد ودھارا تھیا، لہٰذا کہیں طریقے نال وی اے نئیں آکھیا ونڄ سڳدا جو اے کارکردگی ٹھیک کائنی۔ ایویں ہی، جی ڈی پی دے تناسب نال ٹیکساں دی شرح اچ بتدریج ودھارا تھئے۔ مالی سال 2023-24ء اچ جی ڈی پی دے تناسب نال ٹیکساں دی شرح 8.5 فیصد ہائی جیڑھی گزریل مالی سال وچ10.3 فیصد دی سطح تے آئی اَتے امید اے جو جاری مالی سال دے آخر اچ اے11 فیصد دی سطح تے پُڄ ویسی۔ وزیر خزانہ آکھیا جو ٹیکس دے نظام اچ پیپلز، پراسیس اَتے ٹیکنالوجی دی بنیاد تے اصلاحات دا جامع پروگرام جاری اے۔ وزیر اعظم ہر ہفتے خود انہاں اصلاحات دا جائزہ گھِندن۔ جاری مالی سال ٹیکس وصولیاں اچ 10.3 فیصد ودھارا تھیا اے۔ ٹیکس دی بنیاد کوں ودھایا ویندا پئے۔ جاری مالی سال دے دوران گزریل مالی سال دے مقابلے اچ200 رب روپے ودھ وصول کیتے ڳئے۔ انکم ٹیکس اچ 11 فیصد، سیلز ٹیکس وچ 8.5 فیصد، فیڈرل ایکسائز ݙیوٹی اچ 18.2 فیصد اَتے کسٹم ݙیوٹی اچ10.2 فیصد دا ودھارا تھئے۔4 لکھ دے نیڑے ری ٹیلرز اَتے ہول سیلرز اپݨے ریٹرن جمع کرائن جیڑھے (Nil) ریٹرن کائنا ہِن۔ وزیر خزانہ آکھیا جو انفورسمنٹ اَتے تعمیل اچ بہتری گھن آئی ویندی پئی اے۔ سیمنٹ اَتے چینی دے شعبے کوں ترجیح ݙتی ڳئی اے، اے ݙو شعبے ایجھیں ہن جِتھاں پیداوار دی مصنوعی ذہانت نال نگرانی کیتی ویندی پئی اے۔ جاری مالی سال دے پہلے 5 مہینیاں اچ چینی دے شعبے اچ 7 ارب روپے اَتے سیمنٹ دے شعبے اچ 10 ارب روپے دے اضافی ٹیکس حاصل کیتے ونڄ چُکین۔ مشروبات، ٹوبیکو اَتے ٹیکسٹائل دے شعبہ جات تئیں ایںدا دائرہ کار کھنݙایا ویندا پئے۔ انہاں آکھیا جو ٹیکس چوری تے حکومت ایکشن گھنسی اَتے ایںدے اچ ٹیکنالوجی نال مدد ڳھدی ویسی۔ وزیر خزانہ آکھیا جو آئی ایم ایف دی رپورٹ پاکستان دی حکومت شروع کیتی ہائی جیںدے اچ اساں بھرپور معاونت ݙتی۔ 100 توں ودھ میٹنگز تھئن جیندے اچ 30 توں ودھ محکمے شامل ہن۔ اے تکنیکی رپورٹ اے اَتے ایں رپورٹ اچ موجودہ حکومت دے دور اچ تھیوݨ آلی پیشرفت دی تائید کیتی ڳئی اے۔ آئی ایم ایف پاکستان اچ اصلاحات دے عمل دی تعریف کیتی اے۔ ایں رپورٹ اچ بہتر مالی کارکردگی، فِسکل سرپلس، مہانگائی اتے شرح سود اچ گھٹکی، ݙیجیٹائزیشن، سٹیٹ بینک، ایف اے ٹی ایف دی گرے لسٹ توں پاکستان دے اخراج اَتے ٻئے حکومتی اقدامات دی تائید کیتی ڳئی اے۔ آئی ایم ایف بعض ڈھانچہ جاتی کمزوریاں دا ݙسائے اَتے اے صرف پاکستان دے حوالے نال نئیں ٻھل انہاں 22 ملکاں دے حوالے نال ہین جیڑھے آئی ایم ایف دے پروگرام اچ شامل ہن۔ ایں رپورٹ اچ 15 سفارشات آئن جیںدے تے حکومت 31 دسمبر توں پہلے ایکشن پلان ݙیسی۔ انہاں اچوں ٻہوں ساریاں سفارشات تے حکومت پہلے توں کم کریندی پئی اے۔ ٹیکس نظام، آڈٹ نظام اَتے ٻئے اقدامات ایف بی آر اچ اصلاحات دے عمل اچ شامل ہین۔