امریکا ریکوڈک مائننگ منصوبے کیتے 1.25 ارب ڈالر دی فنانسنگ دی منظوری ݙے ݙتی

اسلام آباد، 10 دسمبر(اے پی پی)امریکی سفارتخانے اسلام آباد دی ناظم الامور (CDA) نٹالی اے بیکر اعلان کریندے ݙسائے جو امریکا پاکستان دے ریکوڈک سائیٹ تے اہم معدنیات دی ترقی کوں سپورٹ کرݨ کیتے 1.25 ارب ڈالر دے وݙے فنانسنگ پیکیج دی منظوری ݙے ݙتی اے۔ سوشل میڈیا پلیٹ فارم ایکس اپݨے ویڈیو سنیہے اچ بیکر آکھیے جو یو ایس ایکسپورٹ اِمپورٹ بینک (EXIM) ہݨ ہی فنانسنگ دی منظوری ݙتی اے ڄیڑھی ݙوہاں ملکاں وچال معاشی تعلقات کوں ٻیا تکڑا کریندے پاکستان دے معدنی شعبے کوں اڳونہا کریسی۔ انہاں اطمینان کریندے آکھیا جو یو ایس ایکسپورٹ اِمپورٹ بینک پاکستان دے ریکوڈک اچ اہم معدنیات دی کان کنی کوں سہارا ݙیوݨ کیتے 1.25 ارب ڈالر دی فنانسنگ دی منظوری ݙتی اے، آندے سالاں اچ “ایگزم” دی پروجیکٹ فنانسنگ ریکوڈک مائن بݨاوݨ اتے چلاوݨ کیتے درکار تقریباً 2 ارب ڈالر مالیت دے اعلیٰ معیار دا امریکی کان کنی دا سازو سامان اتے خدمات گھن آوݨ اچ ہتھ ونݙیسی۔ ایں منصوبے نال ݙوہاں پاسوں وݙے روزگار دے مواقع ملم دی امید اے جیندے اچ امریکا اچ تقریباً چھی ہزار نوکریاں اتے بلوچستان اچ تقریباً ساݙھے ست ہزار نوکریاں نکلݨ دا امکان اے ایندے نال مقامی آبادی کوںو دھ فیدہ ملیس اتے او وی علاقائی معاشی ترقی اچ ہتھ ونݙا سڳسن۔ بیکر ریکوڈک دے ایں اقدام کوں ݙوطرفہ فائدے اتے تعاون دی نویکلی مثال قرار ݙیندے آکھیے جو اے اقدام ݙوہاں ملکاں کیتے روزگار اتے خوشحالی گھن آسی جݙاں جو امریکی برآمد کنندگان دی وی سپورٹ کریسی اتے پاکستان دی کان کنی دی صلاحیتاں کوں ٻیا ودھیسی۔ اُنہاں زور ݙتے جو ٹرمپ انتظامیہ اینڄھی شراکت داری کوں امریکی سفارت کاری دا ہک اہم ستون ٻݨائے خاص کر انہاں شعبیاں اچ جیڑھے عالمی سپلائی چینز کیتے اہم معدنیات اچ شامل ہوندَن، اساں امریکی کمپنیاں اتے انہاں دے پاکستانی ہم منصباں وچال اہم معدنیات اتے کان کنی دے شعبے اچ ٻئے معاہدے ݙیکھݨ کیتے پر امید ہیں۔ ݙسایا ڳئے جو فنانسنگ دا اے اعلان پاکستان دے معدنی شعبے اچ امریکا دے سَبھ توں وݙے معاشی تعلقات اچوں ہک دی نشاندہی کریندے جیڑھا ایں ویلھے ݙو طرفہ تعاون ودھاوݨ دی ݙس ݙیندے جݙاں اہم معدنیات دی عالمی طلب وی تیکھے ودھدی ویندی اے