امریکا پاک فضائیہ دے ایف۔16 ٻیڑے کیتے686 ملین ڈالر دے اپ گریڈ پیکیج دی منظوری ݙے ݙتی

واشنگٹن۔ 11 دسمبر(اے پی پی) امریکا پاکستان ایئر فورس (پی اے ایف) دے ایف۔ 16 ٻیڑے کیتے686ملین ڈالر دے اپ گریڈ پیکیج دی منظوری ݙے ݙتی اے۔ ایں ڳالھ دا انکشاف امریکی ڈیفنس سکیورٹی کوآپریشن ایجنسی (ݙی ایس سی اے) ولوں8 دسمبر کوں کانگریس کوں بھیڄے ڳئے خط وچ کیتا ڳئے۔ ڈی ایس سی اے دے نوٹیفکیشن دے بعد 30 ݙینھ دے پارلیمانی جائزے دی باضابطہ مدت شروع تھی ڳئی اے، جیں دے دوران امریکی قانون ساز پاکستان کوں ایف۔ 16 ٹیکنالوجی دی فراہمی تے بحث کریسن۔ایجنسی موجب ، اے مجوزہ وِک امریکا دی خارجہ پالیسی اَتے قومی سلامتی دے مقاصد کوں طاقت ݙیسی کیوں جو ایں نال پاکستان کوں جاری انسدادِ دہشت گردی کارروائیاں اَتے مستقبل دے ممکنہ آپریشنز کیتے امریکی اَتے اتحادی فورسز نال انٹر آپریبلٹی برقرار رکھݨ وچ مدد مِلسی۔ اپ گریڈ پیکیج وچ لنک۔16سسٹمز، کرپٹوگرافک آلات، ایویونکس اپ ڈیٹس، تربیت اَتے جامع لاجسٹک معاونت شامل اے۔ اے پیش رفت امریکی صدر نال پاکستان دی سول اَتے عسکری قیادت دیاں خوشگوار ملاقاتاں دے بعد سامݨے آئی اے۔ڈی ایس سی اے دے خط وچ آکھیا ڳیا جو اے وِک پاکستان دے بلاک۔ 52اَتے مِڈ لائف اپ گریڈ ایف۔ 16 ٻیڑے دی جدید کاری اَتے مرمت دے ذریعے ایں دی موجودہ اَتے آندے خطرات نال نبݨݨ دی صلاحیت کوں برقرار اَتے مضبوط رکھیسی۔ خط وچ آکھیا ڳیا جو اے جدید اپ گریڈز پی اے ایف اَتے امریکی فضائیہ وچال جنگی کارروائیاں، مشقاں اَتے تربیت وچ مزید مؤثر انضمام اَتے انٹرآپریبلٹی کوں ممکن بݨیسن اَتے جہازاں دی عمر2040 تئیں ودھاوݨ دے نال نال اہم حفاظتی امور دا وی حل ݙیسن۔