وزیر اعظم شہباز شریف دی ایرانی صدر مسعود پیزشکیان نال ملاقات

اشک آباد۔ 12 دسمبر(اے پی پی)وزیر اعظم محمد شہباز شریف اَتے ایران دے صدر مسعود پیزشکیان ݙو طرفہ تعلقات کوں مزید مضبوط بݨاوݨ کیتے باقاعدہ اعلیٰ سطح ملاقاتاں اَتے مشاورت جاری رکھݨ تے اتفاق کیتے۔ وزیر اعظم محمد شہباز شریف ترکمانستان دی 30 سالہ مستقل غیر جانبداری دی سالگرہ بارے فورم دے موقع تے اسلامی جمہوریہ ایران دے صدر ڈاکٹر مسعود پیزشکیان نال ݙو طرفہ ملاقات کیتی۔ ݙوہاں رہنماواں ایں سال دے شروع اچ ݙوہاں ملکاں کوں بیرونی جارحیت دا سامݨا کرݨ دے ویلھے ھک ݙوجھے کوں ݙتی ونڄݨ آلی مضبوط حمایت دی تعریف کیتی۔ ایں سال دے شروع اچ پاک-ایران سانجھے اقتصادی کمیشن دے 22 ویں اجلاس دی کامیابی تے اطمینان کریندے وزیر اعظم ݙو طرفہ تجارت دے حجم کوں ودھاوݨ، سرحدی منڈیاں کوں فعال کرݨ، سرحدی سلامتی کوں مضبوط بݨاوݨ اَتے اسلام آباد-بلوچستان ٹرانسپورٹ نیٹ ورک دے ذریعے ݙو طرفہ تعاون کوں مضبوط بݨاوݨ کیتے فریقین دے رَل تے کم جاری رکھݨ دی لوڑھ تے زور ݙِتا۔ ݙوہاں رہنماواں علاقائی اَتے عالمی صورتحال تے الایا۔ وزیر اعظم آکھیا جو افغان سرزمین توں اُٹھݨ آلی دہشت گردی دے حوالے نال پاکستان دے سنگین سکیورٹی خدشے کوں دور کرݨ کیتے افغانستان حکومت بامعنی کارروائی کرے۔ ݙوہاں رہنماواں غزہ اچ جاری امن کوششاں تے وی الایا۔ صدر پیزشکیان آکھیا جو ایران پاکستان نال آپݨے تعلقات کوں مزید مضبوط بݨاوݨ چاہندے۔ بیان دے مطابق اے ملاقات پاکستان اَتے ایران وچال نیڑے دے اَتے برادرانہ تعلقات دی عکاسی کریندی اے جو انہاں دی سانجھی تاریخ، ثقافت اَتے عقیدے نال جُڑے ہوئے ہین۔ ݙوہاں رہنماواں ݙو طرفہ تعلقات کوں مزید مستحکم کرݨ کیتے باقاعدہ اعلیٰ سطح ملاقاتاں اَتے مشاورت جاری رکھݨ تے اتفاق کیتا۔ وزیر اعظم ایران دے رہبر اعلیٰ آیت اللہ خمینی کیتے دلوں تہنیتی اَتے نیک خواہشات پچائن۔