اقوام متحدہ، پاکستان بھارت دی آئینی و قانونی عمل تے تنقید کوں مسترد کر ݙِتا

اقوام متحدہ۔ 16 دسمبر(اے پی پی) پاکستان اقوام متحدہ دی سلامتی کونسل وچ بھارت دی بے بنیاد اَتے بے جا تنقید کوں مسترد کریندے آکھیا جو کہیں وی ملک دے آئین وچ ترمیم اُو ملک دے عوام دے منتخب نمائندیں دا حق اے اَتے کہیں غیر ملکی کوں ایں تے ڳالھ کرݨ دا اختیار کائنی۔پاکستانی مندوب گل قیصر سروانی سلامتی کونسل وچ آکھیا جو بھارت کنے پاکستان دے آئینی عمل تے سوال چاوݨ دا کوئی اخلاقی جواز کائنی۔ انہاں آکھیا جو بھارت آپݨے غیر قانونی زیر تسلط جموں و کشمیر دے حوالے نال کونسل وچ آپݨے وعدے پورے نی کیتے۔پاکستانی مندوب بھارتی دعویں کوں غلط فہمیاں تے مبنی قرارݙِتا اَتے واضح کیتا جو کشمیر بھارت دا حصہ نہ ہئی، نہ ہے اَتے نہ ہی مستقبل وچ ہوسی۔ دہشت گردی دے الزامات کوں مسترد کریندے انہاں آکھیا جو پاکستان وچ حملے کرݨ آلے ٹی ٹی پی، فتنہ الخوارج، اَتے بی ایل اے، ہندوستان دی سرپرستی کریندا پئے، اَتے ایں دے ٹھوس ثبوت موجود ہن۔سندھ طاس معاہدے تے بھارتی ریمارکس کوں “حقائق کوں جاݨ بُجھ تے بھن تروڑ اَتے ھک پابند بین الاقوامی معاہدے دی غلط تشریح” قرارݙِتا۔ انہاں آکھیا جو معاہدے دی کوئی شق ایں کوں یک طرفہ طورتے معطل کرݨ دی اجازت نی ݙیندی