وفاقی وزیرِ خزانہ و محصولات سینیٹر محمد اورنگزیب نال (ٹاور کو پاکستان) اتے وینچر کیپیٹل فرمز دے وفد دی ملاقات

اسلام آباد۔19 دسمبر(اے پی پی)وفاقی وزیرِ خزانہ و محصولات سینیٹر محمد اورنگزیب آکھیے جو حکومت نجی شعبے دی قیادت اچ خاص طور تے ٹیکنالوجی نال جڑے اتے سرمایہ کاری دے زیادہ تقاضے رکھݨ آلے شعبیاں اچ ترقی دیاں سہولتاں ݙیوݨ کیتے پرعزم اے، پورے ملک اچ ڈیجیٹل رابطہ کاری اچ ٹیلی کام دے بنیادی ڈھانچے دیاں کمپنیاں وݙا کردار ادا کریندیاں پین۔ انہاں اے ڳالھ ٹیلی کمیونیکیشن انفراسٹرکچر کمپنیاں (ٹاور کو پاکستان) اتے وینچر کیپیٹل فرمز تے مشتمل وفد نال ملاقات اچ آکھی۔ ایں موقع تے شعبے دے اہم مسئلیاں خاص طور تے ٹیکسیشن، سرمایہ کاری دے ماحول اتے ترقی دے موقعیاں تے ڳالھ مہاڑ کیتی ڳئی۔ وفد آپݨے آپݨے کاروباری ماڈلز، آپریشنل طریقے اتے درپیش چیلنجز، خاص طور تے او مسئلے جیڑھے فزیکل انفراسٹرکچر لاوݨ اتے ریگولیٹری قانون دی پابندی نال جڑے ہن، انھاں دا تفصیلی جائزہ پیش کیتا اتے موجودہ ٹیکس نظام دے کڄھ پہلوواں کوں بہتر بݨاوݨ اتے نرمی کیتے کئی تجویزاں وی ݙتن۔ وزیرِ خزانہ پورے ملک اچ ڈیجیٹل رابطے بݨاوݨ کیتے ٹیلی کام انفراسٹرکچر کمپنیاں دے اہم کردار دی تعریف کیتی۔ ملاقات اچ اتفاق کیتا ڳیا جو ھک خاص ورکنگ گروپ بݨایا ویسی جیندے اچ ٹیکس پالیسی آفس اتے ٻئے متعلقہ اداریاں دے نمائندے شامل ہوسن تاں جو وفد دیاں تجویزاں اتے سفارشاں دا تفصیلی جائزہ گھدا ونڄ سڳے۔ ایں اجلاس اچ وفاقی وزیر برائے آئی ٹی و ٹیلی کمیونیکیشن شزہ فاطمہ خواجہ، چیئرمین ایف بی آر، چیئرمین ایس ای سی پی، وزارت آئی ٹی دے سینئر افسران، ٹاور کو پاکستان دے نمائندے، وینچر کیپیٹل فرمز، قانونی و ریگولیٹری مشاورتی اداریاں دے نمائندے اتے “اگنائٹ” سودھا متعلقہ سرکاری اداریاں دے افسراں شرکت کیتی۔