پی آئی اے دے 75 فیصد حصص دی نجکاری، عارف حبیب کنسورشیم 135 ارب روپے ٻولی ݙے تے کامیاب

اسلام آباد۔ 23 دسمبر(اے پی پی)پاکستان انٹرنیشنل ایئر لائنز دے 75 فیصد حصص خریداری کیتے عارف حبیب کنسورشیم 135 ارب روپے دی سب توں زیادہ بولی ݙے تے ٻولی اچ کامیاب تھی ڳن۔ منگل کوں نجکاری کمیشن پی آئی اے دے 75 فیصد حصص ویچݨ سانڳے ٻولی اچ ترائے کنسورشیمز ٻولیاں جمع کرائیاں ہن۔ لکی سیمنٹ کنسورشیم 101.5 ارب روپے، ایئر بلیو 26.5 ارب روپے، ڄڈاں جو عارف حبیب کنسورشیم سب توں ودھ 115 ارب روپے دی ٻولی ݙتی۔ حکومت ولوں گھٹ توں گھٹ قیمت 100 ارب روپے رکھی گئی ہئی۔ کھلی بولی ویلھے لکی سیمنٹ اتے عارف حبیب کنسورشیم دا مقابلہ تھیا اتے آخر اچ عارف حبیب گروپ 135 ارب روپے دی ٻولی نال کامیاب قرار ݙتے ڳن۔ وفاقی وزیرِ خزانہ محمد اورنگزیب اتے وزیرِ اطلاعات عطا اللہ تارڑ وی ایں موقع تے موجود ہن۔ وزیرِ خزانہ آکھیا جو ٻولی دا عمل شفاف طریقے نال کیتا ڳئے اتے اے پاکستان دی کامیابی اے۔ وزیراعظم دے مشیر برائے نجکاری محمد علی آکھیے جو پی آئی اے دی نجکاری حکومت دے اصلاحات دا اہم حصہ اے، کامیاب ٻولی دہندہ 75 فیصد حصص دا 92.5 فیصد پی آئی اے اچ لیسی۔ ادائیگی دے طریقے دے مطابق 67 فیصد ادائیگی 90 توں 120 ݙینہاں اچ کیتی ویسی جڈاں جو باقی ادائیگی ہک سال اچ کیتی ویسی۔ جیہڑا وی نواں مرحلہ شروع تھیسی، اوندے نال ملکی معیشت کوں فائدہ تھیسی۔