اسلام آباد۔ 30 دسمبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیے جو پاکستان آندے کجھ ہفتیاں اچ چینی کیپیٹل مارکیٹ اچ پانڈا بانڈ جاری کرݨ کیتے تیار اے تے اے قدم پاکستان تے چین وچال مالی تے اقتصادی تعلقات کوں ٻیا مضبوط بݨاوݨ دی پاسے ہک اہم پیش رفت اے۔ اے ڳالھ انہاں چائنا گلوبل ٹیلی ویژن نیٹ ورک کوں انٹرویو ݙیندیں ہوئیں آکھی۔ وزیر …
پاکستان پانڈا بانڈ دے اجرا کیتے تیار اے، پاک چین اقتصادی شراکت داری نویں مرحلے اچ داخل تھی ڳئی اے، وفاقی وزیر خزانہ محمد اورنگزیب دا سی جی ٹی این کوں انٹرویو
اسلام آباد۔ 30 دسمبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیے جو پاکستان آندے کجھ ہفتیاں اچ چینی کیپیٹل مارکیٹ اچ پانڈا بانڈ جاری کرݨ کیتے تیار اے تے اے قدم پاکستان تے چین وچال مالی تے اقتصادی تعلقات کوں ٻیا مضبوط بݨاوݨ دی پاسے ہک اہم پیش رفت اے۔ اے ڳالھ انہاں چائنا گلوبل ٹیلی ویژن نیٹ ورک کوں انٹرویو ݙیندیں ہوئیں آکھی۔ وزیر خزانہ آکھیا جو پاکستان تے چین دے ݙوپاسہ تعلقات مسلسل مضبوط، مستحکم تے متنوع تھیندے پئن اتے ہݨ اے تعلقات صرف بنیادی ڈھانچے تئیں محدود کائنی بلکہ ہک وسیع مارکیٹ تے مبنی اقتصادی شراکت داری اچ تبدیل تھی ڳئن۔ وزیر خزانہ چین کوں پاکستان دا سب توں وݙا تجارتی شراکت دار قرار ݙیندے ہوئیں ݙسایا جو رواں سال دے پہلے اٹھ مہینیاں اچ ݙوہیں ملکاں وچال تجارتی حجم تقریباً 17 ارب امریکی ڈالر تئیں پڄ ڳئے۔ انہاں آکھیا جو پاک چین تعلقات ݙہاکیاں توں مسلسل مضبوط تھیندے پئن اتے چین ہر بین الاقوامی فورم تے پاکستان دا بھرپور ساتھ ݙتا اے، پاکستان دی اقتصادی ترقی اچ چین دا کردار بالخصوص چین پاکستان اقتصادی راہداری (سی پیک) دے ذریعے نہایت اہم رہیے، جیڑھا بیلٹ اینڈ روڈ انیشی ایٹو دا نمایاں منصوبہ اے۔ سی پیک دے پہلے مرحلے اچ سڑکاں، بندرگاہاں، ہوائی اݙیاں تے توانائی دے منصوبیاں سمیت بنیادی ڈھانچے تے توجہ ݙتی ڳئی جݙاں جو صدر شی جن پنگ تے وزیر اعظم لی چیانگ نال ایں سال تھیوݨ آلی اعلیٰ سطحی ملاقاتاں توں بعد سی پیک دے ݙوجھے مرحلے دا باقاعدہ آغاز تھی ڳئے۔ سی پیک فیز ٹو اچ موجودہ انفراسٹرکچر کوں معاشی طور تے مؤثر بݨاوݨ تے توجہ ݙتی ویندی پئی اے تے اے مرحلہ زیادہ تر بزنس ٹو بزنس تعاون تے مبنی اے جیڑھا نجی شعبے دی قیادت اچ پائیدار ترقی دی پاسے ہک واضح پیش رفت اے۔عالمی غیر یقینی صورتحال تے جغرافیائی کشیدگی دے حوالے نال ڳالھ کریندیں ہوئیں وزیر خزانہ آکھیا جو پاکستان دی پالیسی چین دے نال دیرینہ شراکت داری کوں ٻیا مضبوط بݨاوݨ تے مرکوز اے، مستقبل دے منظر نامے بارے وزیر خزانہ آکھیا جو پاکستان تے چین وچال ہݨ ہک واضح سٹریٹجک تے اقتصادی روڈ میپ موجود اے، جیڑھا حالیہ اعلیٰ سطح ݙوپاسہ ملاقاتاں توں بعد طے تھیے۔ انہاں آکھیا جو ݙوہیں ملک نہ صرف جغرافیائی تے سیاسی ترجیحات تے ہم آہنگ ہن بلکہ ہک طویل المدتی اقتصادی ایجنڈے تے وی متفق ہن جیڑھا آندے سالاں اچ پاک چین پائیدار، سدا بہار تے سٹریٹجک تعاون کوں ٻیا مضبوط بݨیسی۔
