معاشی بہتری کیتے اصلاحات ناگزیر،اوکھے فیصلے دے نتیجے سامݨے آندے پئن، وزیر اعظم شہباز شریف دا خطاب

اسلام آباد۔ 31 دسمبر(اے پی پی) وزیر اعظم محمد شہباز شریف معاشی بہتری کیتے اصلاحات کوں ناگزیر قرار ݙیندے ہوئیں آکھیے جو اوکھے فیصلے دے نتیجے سامݨے آندے پئن، ݙو سال دے دوران پاکستان بہترین معاشی ترقی کیتی اے، غیر متزلزل عزم نال چیلنجز دا مقابلہ کیتا تے ملک کوں درست سمت وچ ٹور ݙتے، جے ایں رفتار نال اڳوں ودھدے ریہے تاں کامیابی ساݙا مقدر اے۔ انھاں خیالات اے ڳالھ اقتصادی گورننس اصلاحات دی تقریبِ رونمائی نال ویڈیو لنک دے ذریعے خطاب کریندے آکھی اے۔ ایں موقع تے وزیر خزانہ سینیٹر محمد اورنگزیب سودھے وفاقی وزراء، حکومت دی معاشی ٹیم دے ممبران تے اعلیٰ سرکاری حکام وی موجود ہن۔وزیراعظم حکومت دی معاشی کامیابیاں کوں اجاگر کریندے آکھیا جو جݙاں اقتدار سنبھالیا تاں اساکوں شدید چیلنجز دا شکار معیشت ورثے وچ ملی، پراساں ملک کوں دوبارہ درست سمت وچ پا ݙتا ، افراطِ زر 30 فیصد تئیں ہئی پراساں مشکل کم دا ٻیڑا چاتا۔ انھاں آکھیا جو کرنٹ اکاؤنٹ خسارہ ہݨ سرپلس وچ بدل چکئے تے ٹیکس ٹو جی ڈی پی تناسب 10 فیصد توں ودھ ڳئے۔ افراطِ زر 29.2 فیصد توں گھٹ تھی تے 4.5 فیصد تے آ ڳئے تے زرمبادلہ دے ذخیرے 21.2 ارب ڈالر توں وی ودھ ڳئن۔ انھاں پی آئی اے دی نجکاری کوں وݙا قدم قرار ݙتا۔وزیر خزانہ سینیٹر محمد اورنگزیب بریفنگ ݙیندے ݙسایا جو مالی سال 2024-25 وچ شرح نمو 3.1 فیصد رہی جیڑھی مالی سال 2026 دی پہلی سہ ماہی وچ مزید ودھ تے 3.71 فیصد تئیں پڄ ڳئی اے۔ انھاں آکھیا جو ایف بی آر دے جی ڈی پی تناسب نال ٹیکساں وچ اضافہ تھئے جیڑھا گزریل 25 سالاں وچ بلند ترین سطح اے۔ انھاں آکھیا جو پالیسی ریٹ وی 22 فیصد توں گھٹ تھی تے 10.5 فیصد تے آڳئے