وفاقی وزیرقیصر احمد شیخ نال شیل کمپنی دے وفد دی ملاقات

اسلام آباد۔ 31 دسمبر (اے پی پی) وفاقی وزیر سرمایہ کاری بورڈ قیصر احمد شیخ نال شیل کمپنی دے وفد ملاقات کیتی، ملاقات وچ سرمایہ کاری دے ودھارے تے کاروباری تعاون دے امور تے ڳالھ مہاڑ کیتی ڳئی۔ سرمایہ کاری بورڈ دے اعلامیہ موجب ملاقات اچ ڳالھ کریندے قیصر احمد شیخ آکھیا جو شیل کمپنی دی آوݨ آلے چار سالاں وچ 100 ملین ڈالر توں ودھ سرمایہ کاری خوش آئند اے۔ انھاں آکھیا جو خیبر پختونخوا وچ شیل کمپنی دے سرمایہ کاری منصوبیں تے پیشرفت جاری اے۔ انھاں آکھیا جو کمپنی دی طرفوں سٹوریج سائٹ قائم کرݨ دی منصوبہ بندی خوش آئند اے۔وفاقی وزیر مزید آکھیا جو سرمایہ کاری بورڈ کاروبار وچ سوکھ کیتے ہر ممکن تعاون ݙتا ویندا پئے ۔ بی ایف سی سنگل ونڈو آپریشن دے ذریعے سہولیات ݙیندا پئے۔ انھاں آکھیا جو بی ایف سی دے ذریعے سرمایہ کاری تے کاروبار وچ سوکھ کوں ودھارا ݙتا ویندا پئے، سرمایہ کاری بورڈ سرمایہ کاراں دی مکمل معاونت دے عزم تے قائم اے۔ملاقات دے دوران شیل کمپنی دے وفد وفاقی وزیر کوں ݙسایا جو کمپنی دے پاکستان وچ ایں وقت تقریباً 650 فیول پمپس کم کریندے پئن۔ وفاقی وزیر کوں ݙسایا ڳیا جو آوݨ آلے چار سالاں وچ فیول پمپس دی تعداد ہک ہزار توں ودھ ودھاوݨ دا ہدف مقرر کیتا ڳئے۔ شیل کمپنی دے نمائندے سرمایہ کاری بورڈ دے تعاون تے شکریہ ادا کیتا۔