سالِ نو دے موقع تے قوم کوں دلی مبارکباد، دعا اے جو نواں سال پاکستان سودھے پوری دنیا کیتے امن، ترقی تے خوشحالی دا پیامبر ثابت تھیوے، چیئرمین سینیٹ سید یوسف رضا گیلانی

اسلام آباد۔ 1 جنوری (اے پی پی) چیئرمین سینیٹ سید یوسف رضا گیلانی سالِ نو “2026” دے موقع تے قوم کوں دلی مبارکباد پیش کریندیں ہوئیں ایں امید دا اظہار تے دعا کیتی جو نواں سال پاکستان سودھے پوری دنیا کیتے امن، ترقی تے خوشحالی دا پیامبر ثابت تھیوے۔ سینیٹ سیکرٹریٹ توں جاری بیان اچ انھاں آکھیا جو میݙی دعا اے جو 2026 دا سڄھ ملکِ عزیز پاکستان تے دنیا بھر دے مظلوم تے محروم عوام کیتے خوشحالی، استحکام تے بہتری دی نوید گھن تے طلوع تھیوے۔ انھاں آکھیا جو نویں سال دا آغاز ساکوں اے موقع فراہم کریندے جو آپݨی انفرادی تے اجتماعی زندگیاں اچ مثبت تبدیلی گھن آؤں اتے ہک روشن تے پُرامن مستقبل کیتے رَل تے کم کروں۔ چیئرمین سینیٹ آکھیا جو 2025 دے دوران دنیا کوں سنگین معاشی، سیاسی، سلامتی تے دہشت گردی جہیں چیلنجز رہین، میݙی دعا اے جو نواں سال بکھ، غربت، جنگ، دہشت گردی، فرقہ واریت تے طبقاتی تقسیم جہیں مسائل دے خاتمے دا سال ثابت تھیوے۔ انھاں آکھیا جو دنیا کوں درپیش تنازعات دا پائیدار حل صرف تے صرف مذاکرات تے مکالمے دے ذریعے ای ممکن اے، جڈانجو دہشت گردی سویں عالمی مسئلے نال نبڑݨ کیتے سانجھا لائحہ عمل ضروری اے۔