وفاقی وزیر داخلہ محسن نقوی دی صدارت سی ڈی اے ہیڈ کوارٹرز اچ خصوصی اجلاس

اسلام آباد۔ 1 جنوری (اے پی پی) وفاقی وزیر داخلہ محسن نقوی دی زیرِ صدارت سی ڈی اے ہیڈ کوارٹر اچ خصوصی اجلاس تھیا جیندے اچ عوام دی فلاح تے بہبود دے کئی پراجیکٹس تے پیش رفت دا تفصیلی جائزہ گھدا ڳیا اتے شہریاں دی سہولت کیتے ٻئے پراجیکٹس شروع کرݨ دا فیصلہ کیتا ڳیا۔ اجلاس اچ فیصلہ کیتا ڳیا جو اسلام آباد اچ “سٹیٹ آف دی آرٹ” کرکٹ سٹیڈیم بݨسی۔ وزیر داخلہ محسن نقوی 10 ݙینہہ اچ سٹیڈیم دا حتمی ڈیزائن طلب کر گھدے۔ اجلاس اچ نیشنل پارک کیتے مخصوص ایریا مختص کرݨ دا فیصلہ کیتا ڳیا جڈانجو اسلام آباد اچ جدید طرز تے سیف سٹی پراجیکٹ دا دائرہ کار ودھاوݨ دا فیصلہ کیتا ڳیا۔ اجلاس اچ کشمیر چوک تے ٹریفک دی روانی کیتے “سمارٹ انڈر پاس” دی تعمیر دا فیصلہ کیتا ڳیا۔ وزیر داخلہ محسن نقوی ہدایت کیتی جو 10 ݙینہہ اچ سمارٹ انڈر پاس دا حتمی ڈیزائن تیار کر تے پیش کیتا ونڄے۔ اجلاس اچ اسلام آباد اچ فائیو سٹار ہوٹل دی تعمیر کیتے معروف کمپنیاں دی خدمات حاصل کرݨ دا فیصلہ کیتا ڳیا۔ اسلام آباد اچ عرصہ دراز توں خالی کمرشل پلاٹس دی تفصیلات طلب کر گھدیاں ڳئیاں۔ اجلاس اچ سالڈ ویسٹ مینجمنٹ کمپنی دی خدمات حاصل کرݨ کیتے خصوصی ٹیم بݨاوݨ دا فیصلہ کیتا ڳیا جڈانجو قانون نافذ کرݨ آلے اداریاں دے ہیڈ کوارٹر کیتے زمین مختص کرݨ دا فیصلہ کیتا ڳیا۔ وزیر داخلہ محسن نقوی آکھیا جو اسلام آباد اچ تجاوزات دے خلاف آپریشن پوری قوت نال جاری رہسی۔ واگزار کرائی ڳئی زمین دا عوامی مفاد کیتے بہترین استعمال کیتا ویسی۔ اجلاس اچ وفاقی دارالحکومت اچ نویں کنونشن سنٹر دی تعمیر کیتے مختلف تجاویز تے غور کیتا ڳیا۔ اجلاس اچ فیڈرل کانسٹیبلری، رینجرز تے اسلام آباد ٹریفک پولیس دے ہیڈ کوارٹرز کیتے زمین مختص کرݨ کیتے مختلف تجاویز دا جائزہ گھدا ڳیا۔ چیئرمین سی ڈی اے محمد علی رندھاوا بریفنگ ݙتی۔ آئی جی اسلام آباد پولیس علی ناصر رضوی، ڈپٹی کمشنر، ایڈیشنل ڈپٹی کمشنر جنرل تے سی ڈی اے دے ممبران تے اعلیٰ حکام اجلاس اچ شریک ہن۔