وزیراعظم شہباز شریف دی زیرِ صدارت پٹرولیم ڈویژن متعلق امور تے اہم اجلاس

اسلام آباد۔ 1 جنوری (اے پی پی) وزیراعظم محمد شہباز شریف قیمتی زرمبادلہ بچاوݨ کیتے تیل و گیس دے نویں ذخیرے دی دریافت کوں حکومتی ترجیحات وچ شامل کرݨ تے تیل و گیس دی سپلائی چین کوں درآمد تھیوݨ توں گھن تے صارفین دے استعمال تئیں ڈیجیٹائز کرݨ کیتے وقتی اقدامات دی ہدایت کیتی اے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت پٹرولیم ڈویژن متعلق امور تے اہم اجلاس منعقد تھیا جیندے وچ نائب وزیراعظم / وزیرخارجہ اسحاق ڈار، وفاقی وزیر اقتصادی امور احد خان چیمہ، وزیر پٹرولیم ڈویژن علی پرویز ملک تے متعلقہ سرکاری افسراں شرکت کیتی۔اجلاس نال خطاب کریندے وزیراعظم ہدایت کیتی جو تیل و گیس دی سپلائی چین کوں درآمد تھیوݨ توں گھن تے صارفین دے استعمال تئیں ترجیحی بنیاداں تے ڈیجیٹائز کیتا ونڄے۔ انھاں آکھیا جو تیل و گیس دی ترسیل دی سپلائی چین دی ڈیجیٹائزیشن نال انھاں مصنوعات دی سمگلنگ روکݨ ممکن تھیسی تے قومی خزانے کوں فیدہ پڄسی۔ اجلاس کوں پٹرولیم و گیس سیکٹر دے روڈ میپ دے حوالے نال بریفنگ وچ ݙسایا ڳیا جو آئل اینڈ گیس ڈویلپمنٹ کمپنی (او جی ڈی سی ایل) ضلع کوہاٹ وچ ناشپا بلاک وچ تیل و گیس دے وݙے ذخیرے دریافت کرڳھدن۔وزیراعظم ناشپا بلاک وچ تیل تے گیس دے وݙے ذخیرے دی دریافت تے قوم کوں مبارخ ݙتی تے ایں حوالے نال متعلقہ اداریں دے کم دی تعریف کیتی۔ وزیراعظم کوں ݙسایا ڳیا جو انھاں ذخیرے توں روزانہ 4100 بیرل تیل کڈھیا ونڄ سڳسی۔ بریفنگ دے موجب ایں سال سردیاں دے موسم وچ گھریلو صارفین کوں پچھلے سال دے مقابلے وچ بہتر پریشر نال گیس ݙتی ویندی پئی اے، آر ایل این جی دے کنکشنز تے تکھے کم جاری اے تے جون 2026 تئیں 350,000 کنکشنز دا ہدف مکمل کر ڳھدا ویسی۔ بریفنگ وچ ݙسایا ڳیا جو شیوا گیس فیلڈ تے بٹانی گیس فیلڈ کیتے پائپ لائنز کوں کمیشن کیتا ونڄ چکئے جݙاں جوکوٹ پالک گیس فیلڈ توں پائپ لائن تے کم جاری اے RLNGکنکشن دا ہدف پورا کر ڳھدا ویسی۔