راولپنڈی کچہری چوک منصوبے توں متاثر تھیوݨ آلے وکلاء کوں حکومتِ پنجاب معاوضہ ݙیسی، وفاقی وزیر قانون اعظم نذیر تارڑ

راولپنڈی۔ 1 جنوری (اے پی پی) وفاقی وزیرقانون اعظم نذیر تارڑ آکھیے جو راولپنڈی کچہری چوک منصوبے پاروں جیڑھے وکلاء متاثر تھئن، انھاں کوں حکومتِ پنجاب معاوضہ ݙیسی۔ انھاں اعلان کیتا جو حکومتِ پنجاب چیمبرز دی جاہ دے بدلے وکلاء کوں ہک ہینڈسم رقم ادا کریسی جݙاں جو آندے منگل کوں وزارتِ قانون دی طرفوں ترائے کروڑ روپے متعلقہ اکاؤنٹ وچ منتقل کرݙتے ویسن، جیندے تحت 64 وکلاء کوں فی چیمبر پنج پنج لکھ روپے ادا کیتے ویسن۔اے ڳالھ انھاں ڈسٹرکٹ بار راولپنڈی دے زیرِاہتمام وکلاء چیمبرز دے سنگِ بنیاد تے اسرار شہید یوتھ ہال دی افتتاحی تقریب نال خطاب کریندے آکھی۔ ایں موقع تے وزیر قانون اعظم نذیر تارڑ راولپنڈی کچہری پڄے تے وکلاء دے نال سائٹ وزٹ وی کیتا۔اپݨے خطاب وچ وزیر قانون آکھیا جو بھانویں جو راولپنڈی بار ایسوسی ایشن نال انھاں دا براہِ راست پیشہ ورانہ تعلق نئیں ریہا، پر انھاں دے شاگرد اڄ وی ایں بار کوں ووٹ ݙیندن۔ انھاں راولپنڈی بار دے ہک اوکھے مسئلے کوں بہتر انداز وچ حل کرݨ تے بار قیادت دا شکریہ ادا کیتا۔ اعظم نذیر تارڑ واضح کیتا جو بطور وزیر قانون انھاں دا تعلق ملک دی ساری بارز نال اے تے او بار کوں سیاست توں انڄ رکھݨ دے قائل ہن۔ انھاں آکھیا جو لوک اے نئیں ݙسیندے جو آئینی عدالت دے قیام نال عدلیہ مزید مضبوط تے شفاف تھئی اے۔ 26 تے 27 آئینی ترامیم تے تنقید تھئی، پر وکلاء برادری اپݨے آپ کوں ایں جھیڑے توں انڄ رکھیا جیڑھا جو قابلِ تعریف عمل اے۔وزیر قانون دا آکھݨ ہئی جو حکومت تے عدلیہ دی کوئی انا نی ہوندی، ݙوہیں لیٹر آف لاء دے تابع ہوندن۔ انھاں ایں دوران اعلان کیتا جو ملک اسرار احمد شہید دے لواحقین کوں امدادی پیکیج ݙیوݨ دا معاملہ وی وقتی حل کیتا ویسی۔ انھاں مزید آکھیا جو حکومتِ پنجاب وی وقتی راولپنڈی بارایسوسی ایشن کوں واجب الادا ادائیگیاں مکمل کرݙیسی، تاں جو وکلاء کوں درپیش مسئلیں دا مستقل تے پائیدار حل ممکن بݨایا ونڄ سڳے۔