سرائیکی زبان صرف اظہاردا ذریعہ کائنی بلکہ ہک مکمل تہذیبی شناخت اے، خواجہ عامر فرید

ملتان۔ 01 جنوری (اے پی پی) سرائیکی زبان، ادب تے ثقافت دے ودھارے کیتے ہک جامع تے بامقصد ادبی و ثقافتی پروگرام دا انعقاد کیتا ڳئے جیندے وچ سرائیکی وسیب نال تعلق رکھݨ آلے معروف شعراء، ادیباں، دانشوراں تے نینگراں دی ٻہوں وݙی تعداد شرکت کیتی۔ پروگرام دا مقصد سرائیکی ثقافتی ورثے کوں اجاگر کرݨ تے نویں نسل کوں اپݨی زبان تے تہذیب نال جوڑݨ ہئی۔ تقریب دا آغاز سرائیکی ثقافت دے تعارف تے خوش آندے کلمات نال تھئے، جیندے بعد سرائیکی شاعری، لوک گیت تے ثقافتی مکالمے پیش کیتے ڳئے۔ معروف شعراء سرائیکی زبان وچ اپݨا کلام پیش کیتا، جیندے وچ دھرتی، محبت، روایات تے سماجی مسئلیں دی عکاسی کیتی ڳئی۔ لوک گلوکاراں دی دلکش آوازاں سرائیکی ثقافت دی روح کوں اجاگر کیتا تے حاضرین بھرپور داد ݙے تے فنکاراں دی حوصلہ افزائی کیتی۔تقریب نال خطاب کریندے خواجہ عامر فرید کوریجہ آکھیا جو سرائیکی زبان صرف اظہار دا ذریعہ کائنی بلکہ ہک مکمل تہذیبی شناخت اے، جیندے تحفظ تے ودھارے کیتے اجتماعی کوششاں دی لوڑھ اے۔ ایجھے ادبی پروگرام زبان دے ودھارے دے نال معاشرے وچ رواداری، ہم آہنگی تے مثبت سوچ کوں وی ودھارا ݙیندن۔ انھاں ایں ڳالھ تے زور ݙتا جو سرائیکی ادب کوں جدید تقاضیں دے موجب نویں نسل تئیں منتقل کرݨ ویلھے دی اہم لوڑھ اے۔ سرائیکستان پارٹی دے رانا سرفراز نون آکھیے جو ٹی ہاؤس جہیں ادبی مراکز وچ تھیوݨ آلی سرگرمیاں انھاں دی تخلیقی صلاحیتوں کوں اجاگر کریندن تے اپݨی ثقافت نال جڑݨ دا موقع ݙیندن ۔ تقریب وچ ملک ارشد اقبال بھٹہ، آصف دھریجہ سودھے ٻئے سماجی رہنماواں وی شرکت کیتی۔