ایف بی آر دی کارکردگی قابلِ تعریف اے، ریکارڈ ٹیکس وصولی معاشی اصلاحات دی کامیابی دا ثبوت اے، وزیرِ خزانہ محمد اورنگزیب

اسلام آباد۔ 2 جنوری (اے پی پی) وفاقی وزیرِ خزانہ سینیٹر محمد اورنگزیب دسمبر 2025 اچ ریکارڈ ٹیکس وصولی تے فیڈرل بورڈ آف ریونیو (ایف بی آر) دی فیلڈ فارمیشنز دی کارکردگی کوں سراہیندے ہوئیں اینکوں حکومت دے مالیاتی اصلاحات دے ایجنڈے، بہتر ٹیکس تعمیل تے ڈیجیٹل اصلاحات دی کامیابی دا واضح ثبوت قرار ݙتے۔ اے ڳالھیں انھاں ٹیم ایف بی آر نال ویڈیو لنک دے ذریعے خطاب دے دوران کیتا۔ انھاں آکھیا جو گزشتہ 18 مہینیاں اچ نمایاں پیش رفت تھئی اے تے دسمبر 2025 دی وصولیاں ٻہوں حوصلہ افزا ہن۔ انھاں آکھیا جو معیشت دی ڈیجیٹلائزیشن تے کیش لیس لین دین دے فروغ پائیدار نتائج ݙیوݨ شروع کر ݙتن۔ وزیرِ خزانہ ایف بی آر دے عملے تے زور ݙتا جو او ٹیکس نیٹ کوں ودھاوݨ کیتے ݙوݨی محنت کرن۔ انھاں آکھیا جو بہتر ٹیکس تعمیل ای او واحد رستہ اے جیندے ذریعے رسمی شعبے تے ٹیکس دے ٻوجھ کوں گھٹ کیتا ونڄ سڳدے۔ ایندے توں پہلے وزیرِ خزانہ کوں ݙسایا ڳیا جو ایف بی آر دسمبر 2025 اچ 1427.1 ارب روپے ٹیکس وصول کیتے جیڑھا جو ماہانہ ہدف دا 99 فیصد اے۔ اے کہیں وی سال دے دسمبر اچ ہݨ تئیں دی سب توں زیادہ ٹیکس وصولی اے۔ نومبر دے مقابلے اچ دسمبر اچ ٹیکس وصولی اچ 59 فیصد اضافہ تھیا۔ انکم ٹیکس دی وصولی اچ سب توں ودھ اضافہ تھیا جیڑھا جو نومبر دے 402 ارب روپے توں ودھ تے دسمبر اچ 831.5 ارب روپے تئیں پڄ ڳیا۔ سیلز ٹیکس دی وصولی اچ 25 فیصد اضافہ تھیا تے اے 403.7 ارب روپے رہی جڈانجو فیڈرل ایکسائز ڈیوٹی 6 فیصد اضافے دے نال 72.8 ارب روپے تئیں پڄ ڳئی۔ کسٹمز ڈیوٹی دی وصولی اچ وی 15 فیصد اضافہ تھیا تے اے 118.9 ارب روپے رہی۔