وفاقی کابینہ آف گرڈ (کیپٹو پاور پلانٹس) لیوی ایکٹ 2025 اچ ترمیم دے صدارتی حکم نامے دے اجرا کیتے کارروائی دی منظوری ݙے ݙتی

اسلام آباد۔ 2 جنوری (اے پی پی) وفاقی کابینہ آف گرڈ کیپٹو پاور پلانٹس کوں گیس دی فروخت دے حوالے نال آف گرڈ (کیپٹو پاور پلانٹس) لیوی ایکٹ 2025 اچ ترمیم دے صدارتی حکم نامے دے اجرا کیتے کارروائی دی منظوری ݙے ݙتی اے، جڈانجو وزیراعظم محمد شہباز شریف آکھیے جو پی آئی اے دے 75 فیصد شیئرز دی نجکاری کامیابی نال طے تھئی اے اتے بڈنگ دا عمل ٻہوں شفاف ریہے، ایں مالی سال دی پہلی سہ ماہی اچ جی ڈی پی اچ خاطر خواہ اضافہ خوش آئند اے، متحدہ عرب امارات دے صدر شیخ محمد بن زاید النہیان نال اڄوکی ملاقاتاں ݙوپاسہ تعلقات تے آپسی مشاورت دے تناظر اچ ٻہوں مفید رہیاں، سعودی ولی عہد تے وزیراعظم شہزادہ محمد بن سلمان نال پاکستان اتے سعودی عرب وچال تعلقات کوں ٻیا ودھاوݨ بارے ڳالھ مہاڑ تھئی۔ جمعے کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف دی  صدارت وفاقی کابینہ دا اجلاس وزیراعظم ہاؤس اچ تھیا۔ اجلاس دے شرکاء نال ڳالھ مہاڑ کریندیں ہوئیں وزیراعظم وفاقی کابینہ دے ارکان کوں نویں سال دی مبارکباد ݙتی اتے نیک خواہشات دا اظہار کیتا۔ وزیراعظم ایں ڳالھ تے اطمینان دا اظہار کیتا جو پی آئی اے دے 75 فیصد شیئرز دی نجکاری ٻہوں کامیابی نال طے تھئی اے اتے بڈنگ دا عمل ٻہوں شفاف ریہے ۔ انھاں آکھیا جو اساں حکومت اچ آندیں ای اے عزم کیتا ہئی جو خسارے دا شکار ریاستی ملکیتی اداریاں دی نجکاری کیتی ویسی، پی آئی اے دی نجکاری ایں حوالے نال ہک ٻہوں اہم سنگِ میل اے۔ انھاں آکھیا جو خسارے اچ ونڄݨ آلے ریاستی ملکیتی اداریاں دی نجکاری حکومت دے معاشی اصلاحات دے وژن دا حصہ اے۔ انھاں آکھیا جو ایں مالی سال دی پہلی سہ ماہی اچ ملک دی جی ڈی پی اچ خاطر خواہ ودھارا خوش آئند اے۔ انھاں آکھیا جو اساں ملک کوں ڈیفالٹ دے کنڈھے توں کڈھ تے معاشی استحکام تئیں گھن آیوں۔ انھاں متحدہ عرب امارات دے صدر شیخ محمد بن زاید النہیان نال آپݨی اڄوکی ملاقاتاں دا ذکر کریندیں ہوئیں انھاں کوں ݙوپاسہ تعلقات تے آپسی مشاورت دے تناظر اچ ٻہوں مفید قرار ݙتا۔ وزیراعظم آکھیا جو ہک ݙینہہ پہلے انھاں دی سعودی عرب دے ولی عہد تے وزیراعظم شہزادہ محمد بن سلمان نال ٹیلیفون تے خوشگوار ڳالھ مہاڑ تھئی جیندے اچ ݙوہیں ملکاں وچال معاشی تے سٹریٹجک تعلقات دی رفتار تے اطمینان دا اظہار کیتا ڳیا۔ وزیر اعظم آکھیا جو تعلقات کوں ٻیا ودھاوݨ بارے وی ڳالھ مہاڑ تھئی۔ وفاقی کابینہ کابینہ کمیٹی برائے لیجسلیٹیو کیسز دے 30 دسمبر 2025 دے اجلاس اچ کیتے ڳئے فیصلیاں دی توثیق کر ݙتی جیندے اچ اسلام آباد کیپیٹل ٹیریٹری لوکل گورنمنٹ (ترمیمی) آرڈیننس، 2025 دے حوالے نال کارروائی دی توثیق وی شامل اے۔ وفاقی کابینہ اقتصادی رابطہ کمیٹی دے 26 اگست 2025 دے اجلاس اچ کیتے ڳئے فیصلیاں دی توثیق کر ݙتی جیندے اچ آف گرڈ (کیپٹو پاور پلانٹ) لیوی دے حوالے نال بجلی تقسیم کار کمپنیاں دے صارفین کوں ریلیف فراہم کرݨ تے ایں حوالے نال حکمتِ عملی ترتیب ݙیوݨ دے حوالے نال فیصلے دی توثیق وی شامل اے۔ وفاقی کابینہ پٹرولیم ڈویژن دی سفارش تے تھرڈ پارٹی ولوں آف دی گرڈ کیپٹو پاور پلانٹس کوں گیس دی فروخت دے حوالے نال آف گرڈ (کیپٹو پاور پلانٹس) لیوی ایکٹ 2025 اچ ترمیم دے صدارتی حکم نامے دے اجرا کیتے کارروائی دی منظوری ݙے ݙتی۔