پاکستان، مصر، انڈونیشیا، اردن، قطر، سعودی عرب، ترکیہ تے یو اے ای دے وزرائے خارجہ دا غزہ دی صورتحال تے مشترکہ اعلامیہ

اسلام آباد۔ 2 جنوری (اے پی پی) پاکستان، مصر، انڈونیشیا، اردن، قطر، ترکیہ، سعودی عرب تے متحدہ عرب امارات دے وزرائے خارجہ غزہ دی پٹی اچ وڳڑدی ہوئی انسانی صورتحال تے آپݨی گہری تشویش دا اظہار کیتے جیڑھی جو سخت موسم، زور دی بارشاں تے طوفاناں دی وجہ توں ٻئی سنگین تھی ڳئی اے۔ جمعہ کوں دفترِ خارجہ دے مطابق ہک مشترکہ بیان اچ انھاں آکھیا جو اے صورتحال انسانی امداد دی گھٹ رسائی، ضروری چیزاں دی قلت تے عارضی رہائش کیتے درکار سامان دی سست رفتاری نال ترسیل دی پاروں ٻئی اوکھی تھی ڳئی اے۔ وزرائے خارجہ ایں ڳالھ دی نشاندہی کیتی جو سخت موسم انسانی حالات دی نازک حیثیت کوں بے نقاب کر ݙتے بالخصوص انھاں 19 لکھ بے گھر افراد کیتے جیڑھے ناکافی پناہ گاہواں اچ رہندے پئن۔ وزرائے خارجہ اقوامِ متحدہ دی سلامتی کونسل دی قرارداد 2803 تے صدر ٹرمپ دے جامع منصوبے دی مکمل حمایت دا اعادہ کیتا تانجو جنگ بندی کوں یقینی بݨایا ونڄے، غزہ اچ جنگ ختم تھیسی تے فلسطینی عوام کیتے باعزت زندگی ممکن بݨائی ونڄ سڳسی۔ انھاں عالمی برادری توں اپیل کیتی جو او آپݨی قانونی تے اخلاقی ذمہ واریاں پوریاں کرے تے اسرائیل تے دٻاؤ پاوے جو او طبی امداد، صاف پاݨی، ایندھن تے ٻئی ضروری اشیاء دی ترسیل تے لڳی پابندیاں فوری چاوے ۔ انھاں مطالبہ کیتا جو بنیادی ڈھانچے تے ہسپتالاں کوں بحال کیتا ونڄے تے رفح کراسنگ کوں ݙوہیں پاسوں کھولیا ونڄے۔