بلیو اکانومی پاکستان دی معاشی ترقی وچ کلیدی کردار ادا کر سڳدی اے، وفاقی وزیر احسن اقبال

اسلام آباد۔ 2 جنوری (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو بلیو اکانومی پاکستان دی معاشی ترقی وچ کلیدی کردار ادا کر سڳدی اے۔ بلیو اکانومی تے منعقدہ اجلاس نال خطاب کریندے انھاں آکھیا جو گوادر پورٹ تے کراچی پورٹ کوں وسطی ایشیا دے نال تجارتی رابطیں دے ودھارے کیتے ترقی ݙتی ویندی پئی اے تاں جو پاکستان کوں علاقائی تجارت دا موثر گیٹ وے بݨایا ونڄ سڳے۔ انھاں دا آکھݨ ہئی جو بلیو اکانومی کوں صرف ماہی گیری تئیں محدود نئیں رکھیا ونڄ سڳدا بلکہ فش پروسیسنگ، برانڈنگ تے عالمی منڈیاں تئیں رسائی کیتے مارکیٹنگ تے وی بھرپور توجہ ݙیوݨ ناگزیر اے۔پروفیسر احسن اقبال آکھیا جو دنیا دے ڈھیر سارے ملکاں سمندری وسائل دے دانشمندانہ استعمال نال بلیو اکانومی کوں اپݨی معاشی ترقی دا مضبوط ستون بݨائے جݙاں جو پاکستان وچ بالخصوص بلوچستان دے سمندری علاقے قومی معیشت وچ فیصلہ کن کردار ادا کرݨ دی بھرپور صلاحیت رکھیندن۔ انھاں ݙسایا جو وزارتِ منصوبہ بندی میری ٹائم شعبے دے منصوبیں کیتے بنیادی ڈھانچہ تے پالیسی فریم ورک تیار کر ڳھدے ۔ انھاں واضح کیتا جو گوادر کوں ہک طویل المدتی معاشی پلیٹ فارم دے طور تے ترقی ݙتی ویندی پئی اے جِتھاں فشریز تے ایکوا کلچر وچ ویلیو ایڈیشن نال نہ صرف برآمدات وچ ودھارا تھیسی بلکہ روزگار دے نویں موقع وی پیدا تھیسن۔ ایندے علاوہ سیاحت دے شعبے وچ وی بلیو اکانومی دے امکانات توں فیدہ چاوݨ تے کم جاری اے۔ وفاقی وزیر ایں ڳالھ تے تشویش دا اظہار کیتا جو ایں ویلھے پاکستان دی مجموعی قومی پیداوار (جی ڈی پی) وچ بلیو اکانومی دا حصہ صرف ہک فیصد اے جینکوں ودھاوݨ کیتے سارے میری ٹائم منصوبیں تے مربوط، جامع تے حل تئیں پڄݨ آلی حکمتِ عملی اپنائی ویندی پئی اے۔ انھاں آکھیا جو قومی ترقی دے وژن “اڑان پاکستان” دے تحت بلیو اکانومی کوں ملک دی معاشی ترقی دا سٹریٹجک ستون بݨایا ڳئے تاں جو پاکستان سمندری وسائل توں بھرپور معاشی فیدہ چا سڳے۔