قومی اسمبلی دی قائمہ کمیٹی اطلاعات و نشریات دا اجلاس

اسلام آباد۔ 2 جنوری (اے پی پی) قومی اسمبلی دی قائمہ کمیٹی اطلاعات و نشریات پاکستان ٹیلی ویژن (پی ٹی وی) کیتے جامع بزنس پلان ترتیب ݙیوݨ، تنخواہیں دی وقتی تے مسلسل ادائیگی یقینی بݨاوݨ تے ادارے کوں درپیش مالی مسئلیں دے اسباب دے تعین کیتے رکن کمیٹی ندیم عباس دی کنوینر شپ وچ چار رکنی ذیلی کمیٹی تشکیل ݙے ݙتی اے۔ قومی اسمبلی سیکریٹریٹ توں جاری اعلامیہ موجب قائمہ کمیٹی اطلاعات و نشریات دا اجلاس چیئرمین کمیٹی پلین بلوچ دی زیرِصدارت جمعہ کوں اتھاں پاکستان ٹیلی ویژن ہیڈ کوارٹرز وچ منعقد تھیا۔قائمہ کمیٹی بجلی دے ٻلاں دے ذریعے پی ٹی وی لائسنس فیس دی وصولی دے خاتمے دے بعد مالی خرچے پورے کرݨ کیتے بزنس پلان تے متبادل آمدݨ دے ذرائع پیش نہ کرݨ تے تشویش دا اظہار کیتا۔ کمیٹی دی رائے ہئی جو پی ٹی وی محض سرکاری گرانٹس تے انحصار کریندے اپݨے آپریشنل اخراجات تے ملازمین متعلق مالی ذمہ واریاں پوریاں کائنی کر سڳدا۔ ایں صورتحال دا جائزہ گھندے کمیٹی رکن کمیٹی ندیم عباس دی کنوینر شپ وچ چار رکنی ذیلی کمیٹی بݨائی جیڑھی پی ٹی وی کیتے جامع کاروباری پلان بݨاوݨ دے نال تنخواہیں دی باقاعدگی نال ادائیگی دے امور تے غور تے ادارے کوں درپیش مالی مشکلات دے اسباب دا جائزہ گھنسی۔ ذیلی کمیٹی کوں پی ٹی وی سپورٹس دی مجموعی کارکردگی، ایندے محصولات دے پورٹ فولیو تے پی ٹی وی سپورٹس دے سربراہ دی کارکردگی دا جائزہ گھنݨ دا مینڈیٹ وی ݙتا ڳئے۔شالیمار ریکارڈنگ اینڈ براڈ کاسٹنگ کمپنی (SRBC) دی موجودہ صورتحال دے بارے وچ اسلام آباد ہائی کورٹ دی طرفوں مقرر کردہ لیکویڈیٹر کمیٹی کوں ݙسایا جے حکومت عدالتی سماعت دے دوران ݙتی ڳئی یقین دہانی موجب ݙو مہینے دے اندر ایس آر بی سی دی بحالی دا منصوبہ پیش کرݨ وچ ناکام رہی تاں کمپنی کوں مکمل طور تے بند کرݨ دے سوا کوئی ٻیا چارہ کائناں ہوسی۔ انھاں کمیٹی کوں ݙسایا جو کمپنی دی مالی صورتحال پاروں صرف پنجاہ ملازمین کوں برقرار رکھا ڳئے۔ ڈائریکٹر جنرل وزارتِ اطلاعات کمیٹی کوں ݙسایا جو وزارت ادارے دی واجب الادا ذمہ واریاں دا جائزہ گھنݨ تے ایندی بحالی کیتے وزیراعظم دے مشیر سیاسی امور دی سربراہی وچ بݨی کمیٹی کوں ہک تجویز بھیڄی ہوئی اے جیڑھی فی الحال غور و خوض دے مرحلے وچ اے۔ کمیٹی وزارتِ اطلاعات کوں ہدایت کیتی جو معاملے دی موثر پیروی کیتی ونڄے تاں جو کمپنی دا کوئی وی ملازم بے روزگار نہ تھیوے۔ کمیٹی کراچی وچ رکی ہوئی پی ایس ڈی پی (PSDP) منصوبے متعلق ڈائریکٹر جنرل پی بی سی دی رپورٹ تے اطمینان دا اظہار کیتا تے ایں ضمن وچ ٹیکنیکل کمیٹی دی سفارش دا ذکر کیتا جو کنٹینرز وچ پئے آلات حالی چنڳی حالت وچ ہن تے انھاں کوں نصب کیتا ونڄ سڳدے۔ اجلاس وچ ارکان قومی اسمبلی ندیم عباس، کرن عمران ڈار، آسیہ ناز تنولی، رومینہ خورشید عالم، کرن حیدر، شاہین، سحر کامران، سید امین الحق، رانا انصر، مولانا عبدالغفور حیدری تے ٻئے افسراں شرکت کیتی