ایران تے پاکستان وچال میڈیا تعلقات مزید تکڑے تھیسن، ایرانی سفیر

اسلام آباد۔ 2 جنوری (اے پی پی) پاکستان وچ ایران دے سفیر رضا امیری قومی خبر رساں ادارے ایسوسی ایٹڈ پریس آف پاکستان (اے پی پی) دے ہیڈ کوارٹرز دا دورہ کیتا تے ایران و پاکستان دے وچال مضبوط برادرانہ تعلقات تے زور ݙتا۔ دورے دے دوران انھاں اے پی پی دے منیجنگ ڈائریکٹر محمد عاصم کھچی نال ملاقات کیتی جیندے وچ میڈیا دے شعبے وچ تعاون دے ودھارے تے تفصیلی ڳالھ مہاڑ کیتی۔ایرانی سفیر پاکستانی عوام دی ایران کیتے محبت دی تعریف کریندے آکھیا جو پاکستان تے ایران اوکھے ویلھے وچ ہک ٻئے دے ٻیلی ہن۔ انھاں ݙوہیں ملکاں دی سانجھی تاریخ دا حوالہ ݙیندے آکھیا جو آزمائش دیاں گھڑیاں وچ ݙوہیں ملکاں ہمیشہ ہک ٻئے دا ساتھ ݙتا۔ سفیر رضا امیری پاکستان دے نال تعاون دے وسیع امکانات تے روشنی پیندے آکھیا جو فوجی مشقاں، تجارت تے ثقافتی تبادلیں دے شعبیں وچ اشتراک کوں مزید وسعت ݙتی ونڄ سڳدی اے۔ انھاں ݙسایا جو ݙوہیں ملکاں وچال موجودہ تجارتی حجم 3.3 ارب ڈالر اے جینکوں سالانہ 10 ارب ڈالر تئیں گھن ونڄݨ دا ارادہ اے۔ انھاں میڈیا تعاون دی اہمیت تے زور ݙیندے آکھیا جو ایرانی نیوز ایجنسی (ایرنا) تے اے پی پی وچال براہِ راست خبراں دا تبادلہ ݙوطرفہ تعلقات دے ودھارے وچ کلیدی کردار ادا کریندا پئے۔ انھاں غلط معلومات دے تدارک تے عوامی سطح تے رابطے کوں مضبوط بݨاوݨ دی لوڑھ تے وی زور ݙتا۔ایرانی سفیر علاقائی رابطے بہتر بݨاوݨ کیتے ایران دی کوششاں دا ذکر کیتا جنھاں وچ نویں سرحدی رستے کھولݨ تے اسلام آباد توں تہران کیتے براہِ راست پروازاں دا آغاز وی شامل اے۔ انھاں پاکستانی صدر کوں وقتی ایران دے دورے دی دعوت ݙتی۔ اے پی پی دے منیجنگ ڈائریکٹر محمد عاصم کھچی بالخصوص فلسطین دے مسئلے تے ایران دی پاکستان کیتے حمایت دی تعریف کیتی ۔ انھاں تجارت، ثقافت تے میڈیا دے شعبیں وچ تعاون مزید ودھاوݨ دے عزم دا اظہار کریندے ݙوطرفہ تعلقات کوں مضبوط بݨاوݨ وچ مقدس مقامات تے زیارات دے اہم کردار کوں اجاگر کیتا۔ ملاقات وچ اے پی پی دی ایگزیکٹو ڈائریکٹر سبین عثمان خٹک، ڈائریکٹر مارکیٹنگ علی رضا علوی، ڈپٹی ڈائریکٹر ڈپلومیٹک اینڈ گلوبل افیئرز مدثر اقبال جݙاں جو ایرانی سفارتخانے دے کمیونیکیشن عہدیداران ہادی گلریز تے حبیب وی موجود ہن