اسلام آباد۔ 3 جنوری (اے پی پی) دفترِ خارجہ دے ترجمان طاہر حسین اندرابی بھارتی وزیر خارجہ دے پاکستان بارے ݙتے ڳئے ریمارکس تے اپݨے ردِ عمل وچ آکھیے جو پاکستان بھارتی وزیر خارجہ دے غیر ذمہ دارانہ الزامات کوں سختی نال مسترد کریندے ۔ ترجمان اپݨے بیان وچ آکھیا جو بھارت ہک واری ول خطے وچ عدم استحکام تے دہشت گردی دے ودھارے وچ اپݨے تشویشناک کردار توں توجہ …
پاکستان بھارتی وزیر خارجہ دے غیر ذمہ دارانہ الزامات کوں سختی نال مسترد کر ݙتا
اسلام آباد۔ 3 جنوری (اے پی پی) دفترِ خارجہ دے ترجمان طاہر حسین اندرابی بھارتی وزیر خارجہ دے پاکستان بارے ݙتے ڳئے ریمارکس تے اپݨے ردِ عمل وچ آکھیے جو پاکستان بھارتی وزیر خارجہ دے غیر ذمہ دارانہ الزامات کوں سختی نال مسترد کریندے ۔ ترجمان اپݨے بیان وچ آکھیا جو بھارت ہک واری ول خطے وچ عدم استحکام تے دہشت گردی دے ودھارے وچ اپݨے تشویشناک کردار توں توجہ ہٹاوݨ دی کوشش کریندا پئے۔ انھاں آکھیا جو خطے بالخصوص پاکستان وچ دہشت گرد سرگرمیاں دی پشت پناہی تے بھارت دے ملوث ہووݨ متعلق دستاویزی ثبوت موجود ہن۔ترجمان آکھیا جو کلبھوشن یادیو دا معاملہ پاکستان دے خلاف منظم، ریاستی سرپرستی وچ کیتی ونڄݨ آلی دہشت گردی دی ہک واضح مثال اے، ایندے علاوہ ماورائے سرحد قتل، پراکسی عناصر دے ذریعے تخریبی کارروائیاں تے دہشت گرد نیٹ ورکس کوں خفیہ مدد ݙیوݨ دے ول ول سامݨے آوݨ آلے واقعات نہایت تشویش ناک ہن۔ انھاں آکھیا جو اے طرزِ عمل ہندوتوا دی انتہا پسندانہ سوچ تے ایندے پرتشدد حامیاں دے نظریے نال مطابقت رکھیندے۔ ترجمان آکھیا جو بھارت بدستور جموں و کشمیر تے اپݨا غیر قانونی تے پرتشدد فوجی قبضہ برقرار رکھیا ہویا اے ۔ پاکستان کشمیری عوام دی جائز جدوجہد وچ اقوامِ متحدہ دی سلامتی کونسل دی متعلقہ قرارداداں موجب حقِ خودارادیت دے حصول کیتے مکمل سیاسی، اخلاقی تے سفارتی حمایت جاری رکھݨ دے اپݨے عزم تے قائم اے۔ انھاں آکھیا جو سندھ طاس معاہدہ ہک بین الاقوامی معاہدہ اے جیڑھا نیک نیتی تے قابلِ ذکر قربانیاں دے نال طے پاتا۔ بھارت دی طرفوں ایں معاہدے دی کہیں وی یکطرفہ خلاف ورزی نال علاقائی استحکام کوں نقصان پڄسی تے بین الاقوامی قانونی ذمہ واریاں دے احترام دے ایندے دعویں تے سوال اُٹھسن۔ ترجمان آکھیا جو پاکستان معاہدے دے تحت اپݨے جائز حقوق دے تحفظ کیتے سارے ضروری اقدامات کریسی
