چیف جسٹس آف پاکستان دی زیرِ صدارت اعلیٰ سطح دا اجلاس

اسلام آباد۔ 03 جنوری (اے پی پی) چیف جسٹس سپریم کورٹ آف پاکستان جسٹس یحییٰ آفریدی آکھیے جو طویل المدتی ٹیکس جھیڑے نہ صرف مالی وسائل تے دٻاؤ پیندن بلکہ ملکی معیشت تے سرمایہ کاری دے اعتماد کوں وی متاثر کریندن، اساں عدلیہ دی طرفوں ایجھے اقدامات کوں یقینی بݨیسوں جیڑھے وقتی انصاف تے قانونی شفافیت کوں ودھارا ݙیون۔ سپریم کورٹ دے شعبہ تعلقاتِ عامہ دے جاری اعلامیہ موجب گزریل ݙینھ چیف جسٹس دی زیرِ صدارت اعلیٰ سطح دا اجلاس تھیا جیندے وچ ملکی معیشت تے اہم اثرات رکھݨ آلے ٹیکس دے وݙے مقدمات کوں وقتی نبیڑݨ کیتے اصلاحاتی حکمتِ عملی تے تفصیلی غور کیتا ڳئے۔اجلاس وچ جسٹس میاں گل حسن اورنگزیب، سپریم کورٹ دے جج، فیڈرل بورڈ آف ریونیو (ایف بی آر) دے چیئرمین، ایف بی آر دے ممبر (لیگل) تے ٻئے سینئر حکام شرکت کیتی۔ اجلاس وچ لمبی مدت توں زیرِ التوا تے وݙی مالیت آلے ٹیکس جھیڑیں دے حل کیتے مضبوط تے مستقل فریم ورک دی تشکیل تے ڳالھ مہاڑ کیتی ڳئی، جیندے وچ مقدمات دے بیک لاگز گھٹ کرݨ، قانونی شفافیت ودھاوݨ تے عوامی آمدݨ دے تحفظ تے زور ݙتا ڳیا۔ اجلاس وچ زیرِ غور اصلاحاتی حکمتِ عملی وچ اہم تے وݙے ٹیکس مقدمات کوں ترجیحی بنیاداں تے وقتی نبیڑݨ ، ٹیکس حکام تے عدالتی نظام وچال بہتر ہم آہنگی، قانونی تیاری تے مقدمیں دے نظم و نسق کوں مضبوط بݨاوݨ، فیصلیں دے تسلسل تے تکھی رفتار یقینی بݨاوݨ کیتے طریقہ کار تے ادارہ جاتی اقدامات تے غور شامل ہئی۔ سپریم کورٹ دے شعبہ تعلقاتِ عامہ موجب اے اجلاس عدلیہ دے وسیع تر اصلاحاتی ایجنڈے دا حصہ ہئی جیندا مقصد گورننس وچ بہتری، انتظامی تاخیر وچ کمی تے عدالتی عمل کوں ملکی اقتصادی تے ترقیاتی ترجیحات دے موجب ڈھالݨ اے۔