چیئرمین سینیٹ سید یوسف رضا گیلانی دا گلگت بلتستان وچ برفانی تودے ڈھݨ پاروں شہید تھیوݨ آلے پاک فوج دے اہلکاراں کوں خراجِ تحسین

اسلام آباد۔ 4 جنوری (اے پی پی) چیئرمین سینیٹ سید یوسف رضا گیلانی گلگت بلتستان دے برزل پاس وچ برفانی تودے ڈھݨ دے المناک واقعے دے نتیجے وچ شہید تھیوݨ آلے پاک فوج دے کیپٹن اصمد گلفام، سپاہی رضوان تے مشین آپریٹر عیسیٰ کوں خراجِ تحسین پیش کیتے۔ سینیٹ سیکریٹریٹ دے میڈیا ڈائریکٹوریٹ توں جاری بیان وچ چیئرمین سینیٹ آکھیا جو برفانی تودے دے ڈھݨ دا اے افسوسناک واقعہ پوری قوم کیتے ݙکھ دی ڳالھ اے ۔ انھاں آکھیا جو کیپٹن اصمد گلفام، سپاہی رضوان تے مشین آپریٹر عیسیٰ دی شہادت جرات، فرض شناسی تے قومی خدمت دی ہک روشن مثال اے جیندے تے پوری قوم ماݨ کریندی اے۔سید یوسف رضا گیلانی آکھیا جو شدید موسمی حالات وچ پاک فوج دے افسراں تے جواناں دی جانفشانی قوم دے حوصلے بلند کریندی اے، پاک فوج دے انھاں بہادر سپوتاں اپݨی قیمتی جاناں دا نذرانہ ݙے تے وطنِ عزیز تے عوام دی خدمت دی اعلیٰ روایت قائم کیتی اے۔ چیئرمین سینیٹ آکھیا جو برزل پاس وچ شہید تھیوݨ آلے جواناں کوں پوری قوم سلام پیش کریندی اے۔ انھاں آکھیا جو پاک فوج دے افسر تے جوان ہر قسم دے اوکھے حالات وچ قوم دی حفاظت تے خدمت کیتے ہر ویلھے تیار ہن۔ چیئرمین سینیٹ آکھیا جو شہداء دے اہل خانہ دے غم وچ پوری قوم برابر دی شریک اے تے انھاں دے صبر، حوصلے تے استقامت کوں سلام پیش کریندی اے۔ چیئرمین سینیٹ سید یوسف رضا گیلانی دعا کیتی جو اللہ تعالیٰ شہداء دے درجات بلند فرماوے تے ݙکھی خانداناں کوں صبرِ جمیل عطا فرماوے۔