کراکس۔ 4 جنوری(اے پی پی) وینزویلا دے معزول صدرنکولس مادورو کوں امریکا حراست وچ گھنݨ دے بعد انھاں کوں نیویارک منتقل کرݨ دی تصدیق کر ݙتی اے جݙاں جو وینزویلا دی سپریم کورٹ نائب صدر روڈریگیز کوں عارضی طور تے صدر دے عہدے متعلق سارے اختیارات، فرائض تے ذمہ واریاں سنبھالݨ دا حکم ݙتے تاں جو انتظامی تسلسل تے قوم دے دفاع کوں یقینی بݨایا ونڄ سڳے۔ العربیہ خبر رساں …
وینزویلا دے معزول صدر نکولس مادورو کوں گوانتانامو وچ کجھ دیر قید رکھݨ دے بعد نیویارک منتقل
مزید خبراں
کراکس۔ 4 جنوری(اے پی پی) وینزویلا دے معزول صدرنکولس مادورو کوں امریکا حراست وچ گھنݨ دے بعد انھاں کوں نیویارک منتقل کرݨ دی تصدیق کر ݙتی اے جݙاں جو وینزویلا دی سپریم کورٹ نائب صدر روڈریگیز کوں عارضی طور تے صدر دے عہدے متعلق سارے اختیارات، فرائض تے ذمہ واریاں سنبھالݨ دا حکم ݙتے تاں جو انتظامی تسلسل تے قوم دے دفاع کوں یقینی بݨایا ونڄ سڳے۔ العربیہ خبر رساں ادارے “اے پی” دے حوالے نال ݙسایا جو مادورو دا جہاز نیویارک دے سٹیورٹ ہوائی اݙے تے لہہ ڳئے جِتھاں انھاں کوں ہݨ امریکا وچ مقدمے دا سامݨا کرݨا ہوسی۔ݙوجھے پاسے ہک امریکی عہدیدار “وارننگ سٹینڈرڈ جرنل” کوں ݙسایا جو صدر ٹرمپ چاہندن جو نکولس مادورو دی عدالتی سماعت وقتی تھیوے تے انھاں کوں سزا ݙتی ونڄے۔ واضح رہے جو ہفتے دے ݙینھ وینزویلا وچ ہک غیر معمولی امریکی فوجی کارروائی تھئی جیندے وچ صدر نکولس مادورو تے انھاں دی ذال سیلیا فلوریز کوں گرفتار کرتے ملک توں ٻاہر منتقل کیتا ڳیا۔ امریکی صدر موجب اے کارروائی چار ݙینھ پہلے شروع کرݨ دا منصوبہ ہئی پر موسمی حالات پاروں اینکوں ملتوی کر ݙتا ہئی، پر رات ویلھے چیف آف سٹاف، وزیرِدفاع تے امریکی فوجی اداریں کوں خصوصی فوجی کارروائی دا حکم ݙتا ڳیا۔ رپورٹ موجب نکولس مادورو تے انھاں دی ذال کوں پہلے امریکی جنگی جہاز اوی جیما تے منتقل کیتا ڳیا، ول عارضی طور تے گوانتانامو قید خانے وچ رکھیا ڳیا تے بعد وچ انھاں کوں نیویارک منتقل کیتا ڳیا۔ݙوجھے پاسے وینزویلا دی سپریم کورٹ نائب صدر ڈیلسی روڈریگیز کوں ملک دی عبوری سربراہ بݨݨ دا حکم ݙتے۔ اردو نیوزموجب اعلیٰ عدالت فیصلہ ݙتا جو روڈریگیز عارضی طور تے صدر دے عہدے متعلق سارے اختیارات، فرائض تے ذمہ واریاں سنبھلیسن تاں جو انتظامی تسلسل تے قوم دے دفاع کوں یقینی بݨایا ونڄ سڳے۔ اے ایف پی موجب جݙاں نکولس مادورو امریکی جہاز توں لتھے تاں ایف بی آئی دے ایجنٹس انھاں کوں ولا ݙے ڳھدا۔ ایندے بعد انھاں کوں امریکا دی ہک جیل وچ منتقل کر ݙتا ڳیا۔ بعد وچ انھاں کوں ہیلی کاپٹر دے ذریعے مین ہٹن پڄایا ڳیا جِتھاں قانون نافذ کرݨ آلے اداریں دے اہلکاراں دی وݙی تعداد موجود ہئی۔ 63 سالہ نکولس مادورو کوں پہلے امریکی ڈرگ انفورسمنٹ ایجنسی دے دفتر گھن آیا ڳیا تے ول بروکلین وچ واقع میٹروپولیٹن حراستی مرکز وچ منتقل کیتا ڳیا۔ نکولس مادورو تے “نارکوٹیررازم”، امریکا وچ ٹناں دے حساب نال کوکین سمگل کرݨ تے غیر قانونی ہتھیار رکھݨ دے الزامات لاتے ڳئن۔ اقوامِ متحدہ دی سلامتی کونسل دا وینزویلا دی صورتحال تے امریکی کارروائی تے غور کیتے اجلاس سنوار کوں تھیسی، اے ہنگامی اجلاس وینزویلا دی درخواست تے سݙوایا ڳئے۔
