وینزویلا تے امریکی فضائی حملیں وچ 40 بندے ہلاک

واشنگٹن۔ 4 جنوری (اے پی پی) وینزویلا تے امریکی فضائی حملیں وچ گھٹ توں گھٹ 40 بندے ہلاک تھی ڳئن جنھاں وچ عام شہری تے سکیورٹی اہلکار وی شامل ہن۔ شنہوا موجب دی نیویارک ٹائمز وینزویلا دے حکومتی عہدیدار دے حوالے نال رپورٹ کیتا جو ہفتے دے ݙینھ امریکا دے فضائی حملیں وچ وینزویلا وچ گھٹ توں گھٹ 40 لوک ہلاک تھی ڳئن جنھاں وچ عام شہری تے مسلح افواج دے اہلکار شامل ہن۔ رپورٹ موجب اے ٻہوں وݙے پیمانے دا حملہ سویرے اوں ویلھے کیتا ڳئے جݙاں امریکی افواج وینزویلا دے صدر نکولس مادورو تے انھاں دی ذال کوں گرفتار کرݨ کیتے کارروائی کیتی۔

نیویارک ٹائمز دا آکھݨ اے جو انھاں ویڈیو فوٹیج دی تصدیق کیتی اے جیندے وچ وینزویلا دے دارالحکومت کراکس دے لا کارلوٹا ایئرپورٹ دے نیڑے تکھا دھواں تے مسلسل دھماکے ݙٹھے ونڄ سڳدن۔ دارالحکومت دے مغرب وچ واقع شہر کاتیا لا مار وچ ہک فضائی حملہ ترائے منزلہ رہائشی عمارت تے کیتا ڳیا جیندے نتیجے وچ عمارت دی ٻاہرلی کندھیاں ڈھہہ پیاں۔ رپورٹ موجب ایں حملے وچ گھٹ توں گھٹ ہک ٻڈھڑی تریمت ہلاک تھی ڳئی جݙاں جو ہک شخص شدید زخمی تھیا۔ متعدد امریکی میڈیا اداریں وینزویلا حکومتی ذرائع دے حوالے نال ݙسایا جو کراکس دے علاوہ کیریبین ساحلی ریاستاں میرانڈا، اراگوا تے لا گوایرا وچ فوجی اہداف کوں وی نشانہ بݨایا ڳیا۔ وینزویلا دی نائب صدر ڈیلسے رودریگز ایندے توں پہلے آکھیا ہئی جو ہلاک تھیوݨ آلیں وچ شہری تے فوجی اہلکار ݙوہیں شامل ہن پر انھاں حتمی تعداد کائنی ݙسائی۔ امریکی صدر ڈونلڈ ٹرمپ فاکس نیوز کوں ݙتے ڳئے ہک انٹرویو وچ آکھیا جو مادورو کوں گرفتار کرݨ دی کارروائی دے دوران کجھ امریکی اہلکار زخمی تھئے پر کوئی امریکی فوجی ہلاک کائنی تھیا۔ انھاں مزید ݙسایا جو ہک امریکی فوجی طیارے کوں وی ضیان پُڄے۔