کشمیری عوام مسلسل جبر، انسانی حقوق دی خلاف ورزیاں تے بنیادی حقوق تے وقار دی پامالی دا سامݨا کریندے پئن، اسحاق ڈار

اسلام آباد۔ 5 جنوری (اے پی پی) نائب وزیراعظم تے وزیرِ خارجہ سینیٹر محمد اسحاق ڈار آکھیے جو جموں تے کشمیر تے بھارت دا غیر قانونی قبضہ اساݙے عہد دا ہک سنگین المیہ اے کیونجو بھارت دے غیر قانونی زیرِ تسلط جموں تے کشمیر دی عوام مسلسل منظم جبر، انسانی حقوق دی وݙے پیمانے تے خلاف ورزیاں تے آپݨے بنیادی حقوق تے وقار دی پامالی دا سامݨا کریندے پئن۔ “یومِ حقِ خودارادیت” دے موقع تے آپݨے سنیھے اچ نائب وزیراعظم تے وزیرِ خارجہ آکھیا جو حکومت تے پاکستان دے عوام بھارت دے غیر قانونی زیرِ تسلط جموں تے کشمیر دی عوام دے نال غیر متزلزل یکجہتی دا اظہار کریندن، اساں حقِ خودارادیت دے حصول کیتے انھاں دی منصفانہ جدوجہد دی حمایت دے آپݨے پختہ عزم دا اعادہ کریندوں۔ سنوار کوں دفترِ خارجہ توں جاری بیان اچ نائب وزیراعظم و وزیرِ خارجہ محمد اسحاق ڈار آکھیا جو اے ݙینہہ 5 جنوری 1949 کوں اقوامِ متحدہ دے کمیشن برائے بھارت تے پاکستان (UNCIP) دی اوں تاریخی قرارداد دی یاد اچ منایا ویندے جئیں جموں تے کشمیر دی عوام کیتے ہک آزادانہ تے منصفانہ رائے شماری دی باقاعدہ ضمانت ݙتی ہئی۔ اے عہد جموں تے کشمیر دے تنازع تے اقوامِ متحدہ دی سلامتی کونسل دی متعدد قرارداداں اچ درج اے، تے اقوامِ متحدہ دی جنرل اسمبلی ہر سال حقِ خودارادیت دی حمایت اچ اپݨی قرارداداں دے ذریعے ایندی توثیق کریندی اے۔انھاں آکھیا جو بین الاقوامی قانون حقِ خودارادیت کوں اقوامِ متحدہ دے چارٹر اچ درج ہک بنیادی اصول دے طور تے تسلیم کریندے۔ جڈانجو بھارت گزریل ست ݙہاکیاں توں کشمیری عوام کوں ایں حق توں محروم کیتا ہوئے۔ جموں تے کشمیر تے بھارت دا غیر قانونی قبضہ اساݙے عہد دا ہک سنگین المیہ اے، کیونجو بھارت دے غیر قانونی زیرِ تسلط جموں تے کشمیر دی عوام مسلسل منظم جبر، انسانی حقوق دی وݙے پیمانے تے خلاف ورزیاں تے اپݨے بنیادی حقوق تے وقار دی پامالی دا سامݨا کریندے پئن۔۔ انھاں آکھیا جو ایں موقع تے، پاکستان بھارت دے غیر قانونی زیرِ تسلط جموں و کشمیر دی عوام کوں اوں ویلھے تئیں آپݨی اخلاقی، سیاسی تے سفارتی حمایت جاری رکھݨ دے عزم دا اعادہ کریندے جݙاں تئیں او اقوامِ متحدہ دی سلامتی کونسل دی متعلقہ قرارداداں دے مطابق آپݨے ناقابلِ تنسیخ حقِ خودارادیت کوں حاصل نئی کر گھندے۔ پاکستان عالمی برادری، بالخصوص اقوامِ متحدہ توں وی مطالبہ کریندے جو او کشمیری عوام دے نال کیتے ڳئے آپݨے وعدے کوں پورا کرے اتے تنازعہ جموں تے کشمیر دے منصفانہ تے پرامن حل کوں یقینی بݨاوݨ کیتے آپݨا کردار ادا کرے۔