چھوٹے تے درمیانے درجے دے کاروبار ملکی معیشت کیتے ریڑھ دی ہڈی دی حیثیت رکھیندن، وزیراعظم شہباز شریف دا اجلاس نال خطاب

اسلام آباد۔ 5 جنوری (اے پی پی) وزیراعظم محمد شہباز شریف چھوٹے تے درمیانے درجے دے کاروبار دے فروغ کیتے روڈ میپ کوں سراہندے ہوئیں آکھیے جو چھوٹے تے درمیانے درجے دے کاروبار ملکی معیشت کیتے ریڑھ دی ہڈی دی حیثیت رکھیندن۔ اے ڳالھیں انھاں سنوار کوں ملک اچ چھوٹے تے درمیانے درجے دے کاروبار دے فروغ کیتے “سمیڈا” دے بزنس پلان دے حوالے نال اجلاس دی صدارت اچ ڳالھ مہاڑ کریندیں ہوئیں کیتا۔ وزیراعظم آفس دے میڈیا ونگ توں جاری بیان دے مطابق اجلاس اچ چھوٹے تے درمیانے درجے دے کاروبار دے فروغ کیتے آندے ترائے سال دا روڈ میپ پیش کیتا ڳیا۔ وزیراعظم قابلِ عمل تے موثر پلان بݨاوݨ تے معاونِ خصوصی ہارون اختر تے سمیڈا دے نویں منتخب بورڈ آف ڈائریکٹرز کوں سراہندے ہوئیں آکھیا جو چھوٹے تے درمیانے درجے دے کاروبار ملکی معیشت کیتے ریڑھ دی ہڈی دی حیثیت رکھیندن، چھوٹے تے درمیانے درجے دے کاروبار دی ترقی نال ملکی برآمدات اچ اضافے دی بھرپور استعداد موجود اے۔ وزیراعظم متعلقہ اداریاں کوں بینکاں تے ٻئے مالی اداریاں ولوں چھوٹے تے درمیانے درجے دے کاروبار کوں سوکھی شرطاں تے قرضے ݙیوݨ کیتے اقدامات تیز کرݨ دی ہدایت کیتی۔ اجلاس اچ چھوٹے تے درمیانے درجے دے کاروبار کوں درپیش مسائل تے انھاں مسائل دے حل کیتے لائحہ عمل، ایس ایم ایز (SMEs) کوں ملکی برآمدات اچ شامل کرݨ کیتے حکمتِ عملی تے بزنس پلان اچ شامل ٻئے اقدامات تے تفصیلی بریفنگ ݙتی ڳئی۔ اجلاس اچ پاکستان دے ایس ایم ای سیکٹر کوں عالمی مارکیٹ اچ مسابقتی بنیاداں تے متعارف کراوݨ کیتے مختلف ملکاں نال جاری تعاون کوں ٻیا ودھاوݨ دے حوالے نال جاری اقدامات تے وی بریفنگ ݙتی ڳئی جیندے اچ ݙسایا ڳیا جو ملکی ایس ایم ایز دی استعداد ودھاوݨ کیتے حال اچ 6 شہراں اچ کئی ورکشاپاں کیتی ڳئن، چھوٹے تے درمیانے درجے دے کاروبار کوں عالمی سطح تے مقابلے کیتے تیار کرݨ کیتے متعدد تربیتی پروگراماں تے وی کم جاری اے۔ اجلاس اچ تریمتیں دی ایس ایم ای سیکٹر اچ شرکت تے بھرپور کردار ادا کرݨ دے حوالے نال اقدامات تے وی بریفنگ ݙتی ڳئی۔ اجلاس اچ وفاقی وزیرِ اطلاعات تے نشریات عطا اللہ تارڑ، معاونِ خصوصی ہارون اختر، گورنر سٹیٹ بینک جمیل احمد، چاراں صوبیاں تے آزاد کشمیر تے گلگت بلتستان دے چیف سیکریٹریز، سمیڈا دے نویں منتخب بورڈ ارکان تے متعلقہ اداریاں دے افسر شریک ہن۔