وفاقی وزیر برائے منصوبہ بندی، ترقی تے خصوصی اقدامات احسن اقبال دی خوراک دے معیار، کولڈ چینز تے رمضان سپلائی مینجمنٹ تے فوری اقدامات دی ہدایت

اسلام آباد۔ 6 جنوری (اے پی پی) وفاقی وزیر منصوبہ بندی ترقی تے اصلاحات اتے خصوصی اقدامات پروفیسر احسن اقبال دی صدارت اچ نیشنل پرائس مانیٹرنگ کمیٹی دا اجلاس منگل دے ݙینہہ تھیا جیندے اچ مہنگائی دے رجحانات، ضروری چیزاں دی دستیابی، قیمتاں دے استحکام تے خاص طور تے رمضان المبارک توں پہلے غذائی تحفظ کوں مضبوط بݨاوݨ دے اقدامات دا جائزہ گھدا ڳیا۔ اجلاس اچ چیف اکانومسٹ ڈاکٹر امتیاز احمد، پاکستان بیورو آف سٹیٹسٹکس دے چیف سٹیٹسٹیشن، وزارتِ قومی غذائی تحفظ و تحقیق، اسلام آباد انتظامیہ، صوبائی حکومتاں تے سٹیٹ بینک دے نمائندیاں شرکت کیتی۔ پاکستان بیورو آف شماریات مہنگائی دی تفصیلی بریفنگ ݙیندیں ہوئے ݙسایا جو دسمبر 2024 اچ 4.1 فیصد رہݨ آلی ہیڈ لائن مہنگائی دسمبر 2025 اچ ودھ تے 5.6 فیصد تھی ڳئی اے۔ سالانہ بنیاداں تے مہنگائی اچ ودھارے دی وݙی وجوہات گیس دے نرخ، سونے دی قیمتاں اچ اضافہ تے کݨک، کھیر تے چکن دی قیمتاں اچ اضافہ رہیاں۔ ایندے الٹ آلو، ٹماٹر، وصل ،چاہ، دالاں، بجلی تے سٹیشنری سمیت کئی چیزاں دی قیمتاں اچ کمی دا رجحان ݙٹھا ڳیا۔ پی بی ایس ڈسیژن سپورٹ سسٹم آن انفلیشن (DSSI) دے تحت ڈیٹا پیش کیتا، جیندے مطابق ضروری غذائی چیزاں دی قیمتاں اچ استحکام بہتر تھیے۔ 2024 تے 2025 دے تقابلی جائزے اچ ݙسایا ڳیا جو وصل تے آلو سویں روزانہ دیاں چیزاں موجودہ دور اچ نسبتاً گھٹ قیمت تے رہیاں۔گزریل ہک سال اچ 20 کلو آٹے دا تھیلا تقریباً 1800 روپے توں ودھ تے 2146 روپے تھیا۔ اگرچہ مونگ جہیاں کجھ دالاں اچ معمولی اتار چڑھاؤ رہیا، پر مجموعی رجحان رمضان توں پہلے حساس قیمتاں تے دباؤ اچ کمی دی طرف اشارہ کریندے۔ اجلاس کوں ݙسایا ڳیا جو کݨک دی ٻجائی دے اہداف حاصل کر گھدے ڳئن اتے فروری تئیں مکمل موسمی ہدف پورا ہووݨ دی توقع اے، جیندے نال ملکی غذائی تحفظ مضبوط تھیسی۔ کھنڈ تے چکن دی قیمتاں، جیڑھیاں سال دے شروع اچ ودھیاں ہن، نمایاں طور تے گھٹ تھی ڳئین۔ کھنڈ دی قیمت 180 روپے فی کلو توں گھٹ تھی تے تقریباً 150 روپے فی کلو رہ ڳئی اے۔ ساختی مسائل دے حل کیتے وزیر منصوبہ بندی نے وزارتِ قومی غذائی تحفظ و تحقیق کوں کولڈ چین انفراسٹرکچر تے جامع مطالعہ تیار کرݨ دی ہدایت کیتی۔ انھاں خوراک دے معیار تے تشویش دا اظہار کریندیں ہوئے گھیو دی تیاری اچ ہارڈ آئل دے استعمال دا نوٹس گھدا اتے آکھیا جو دل دے امراض اچ اضافہ تھیندا پئے، ایں کیتے خوراک دے معیار تے سختی نال عملدرآمد ضروری اے۔ وزارتِ قومی غذائی تحفظ و تحقیق کوں صوبائی فوڈ کنٹرول اتھارٹیز کوں خطوط بھیج تے مقررہ میلٹنگ ٹمپریچر دے نفاذ تے مضر تیلاں دے استعمال دی روک تھام دی ہدایت کیتی ڳئی۔ پروفیسر احسن اقبال آکھیا جو صارفین دے تحفظ، ملکی پیداوار دے استحکام تے میکرو اکنامک استحکام کیتے وفاقی و صوبائی اداریاں، ریگولیٹرز تے مالیاتی اداریاں دے درمیان مسلسل رابطہ ضروری اے۔ انھاں ڈیٹا تے مبنی پالیسی، بروقت اقدامات تے ساختی اصلاحات دے ذریعے قیمتاں دے استحکام، غذائی تحفظ تے عوامی فلاح کوں قومی منصوبہ بندی دا مرکزی ستون بݨاوݨ دے حکومتی عزم دا اعادہ کیتا۔