زرعی شعبے اچ ترقی دی بھرپور استعداد موجود اے، زرعی برآمدات ودھاوݨ دے حوالے نال لائحہ عمل بݨایا ونڄے، وزیر اعظم محمد شہباز شریف

اسلام آباد۔ 6 جنوری (اے پی پی) وزیر اعظم محمد شہباز شریف زرعی شعبے اچ اصلاحات تے کساناں کوں عالمی سطح تے رائج طریقیاں نال واقف کرواوݨ کوں حکومت دی اولین ترجیح قرار ݙیندیں ہوئیں آکھیے جو زرعی شعبے اچ ترقی دی بھرپور استعداد موجود اے، انھاں زرعی برآمدات ودھاوݨ دے حوالے نال لائحہ عمل بݨاوݨ دی ہدایت وی کیتی۔ پی ایم آفس دے میڈیا ونگ توں جاری بیان دے مطابق وزیر اعظم محمد شہباز شریف اے ڳالھیں منگل کوں اتھاں زرعی برآمدات اچ اضافے تے زرعی شعبے کوں بین الاقوامی تقاضیاں دے مطابق ڈھالݨ دے حوالے نال بݨائے ڳئے نجی شعبے دے ماہرین تے مشتمل ورکنگ گروپ دے اجلاس دی صدارت کریندیں ہوئیں کیتا۔ اجلاس اچ وفاقی وزراء احسن اقبال، رانا تنویر حسین، ڈاکٹر مصدق ملک، محمد اورنگزیب، عطا اللہ تارڑ، وزیرِ مملکت بلال اظہر کیانی، معاونِ خصوصی ہارون اختر تے متعلقہ اعلیٰ حکام شرکت کیتی۔وزیر اعظم محمد شہباز شریف اجلاس نال خطاب کریندیں ہوئیں آکھیا جو زرعی شعبے اچ اصلاحات تے کساناں کوں عالمی سطح دے طریقیاں نال روشناس کراوݨ حکومت دی پہلی ترجیح اے۔ انھاں آکھیا جو وفاقی حکومت زرعی شعبے اچ آپݨے دائرہ کار اچ اصلاحات دے نال نال صوبائی حکومتاں دے نال رل تے زراعت دی ترقی کیتے اقدامات کریندی پئی اے، فی ایکڑ پیداوار اچ اضافے کیتے کساناں کوں معیاری ٻج، مناسب قیمت تے ویلھے سر کھاد تے بیماری دی روک تھام کیتے دوائیاں دی فراہمی کیتے اقدامات جاری ہن۔ زرعی اجناس دی پروسیسنگ نال برآمدات دے قابل چیزاں دی تیاری کیتے پالیسی دی سطح تے اقدامات کیتے ویندے پئن۔وزیرِ اعظم محمد شہباز شریف آکھیا جو حال اچ چین اچ سرکاری خرچے تے ہک ہزار پاکستانی طلبا و طالبات کوں زراعت دی جدید ٹیکنالوجی دی تربیت کیتے بھیجا ڳیا۔ انھاں آکھیا جو پاکستان دے زرعی شعبے اچ ترقی دی بھرپور گنجائش موجود اے۔اجلاس اچ چیئرمین ورکنگ گروپ رانا نسیم تے انھاں دی ٹیم ے زرعی شعبے تے جامع رپورٹ پیش کریندیں ہوئیں اینکوں درپیش مسائل تے اڳلے لائحہ عمل تے تفصیلی بریفنگ ݙتی۔ اجلاس کوں ملک اچ ربیع تے خریف دی وݙی فصلاں، انھاں دی فی ایکڑ اوسط پیداوار، ہارٹی کلچر تے پھلاں دی پیداوار، انھاں دی برآمدات، مال مویشی (گلہ بانی)، ڈیری شعبے تے زراعت نال جڑے سارے شعبیاں دا خطے تے عالمی سطح تے تقابلی جائزہ پیش کیتا ڳیا۔ اجلاس کوں ݙسایا ڳیا جو زرعی اجناس دی پروسیسنگ کیتے وفاقی حکومت سرٹیفیکیشن نظام تے کم کریسی جیڑھا زرعی اجناس تے انھاں توں تیار چیزاں دی قدر (ویلیو) اچ اضافہ یقینی بݨا تے عالمی منڈیاں اچ کساناں کیتے منافع ودھیسی۔ وزیرِ اعظم ورکنگ گروپ ولوں مفصل بریفنگ کوں سراہندے ہوئیں قابلِ عمل، موثر تے جامع روڈ میپ تیار کر تے حکومتی اصلاحات دی سفارشات اچ شامل کرݨ دی ہدایت کیتی۔