خیبرپختونخوا اچ دہشت گرداں کوں سازگار سیاسی ماحول فراہم کیتا ویندے، ریاست آپݨے ہک ہک ٻال دے تحفظ کیتے پرعزم اے، ڈی جی آئی ایس پی آر لیفٹیننٹ جنرل احمد شریف چوہدری دی پریس کانفرنس

راولپنڈی۔ 6 جنوری (اے پی پی) پاک فوج دے شعبہ تعلقاتِ عامہ (آئی ایس پی آر) دے ڈائریکٹر جنرل لیفٹیننٹ جنرل احمد شریف چوہدری آکھیے جو خیبرپختونخوا اچ دہشت گردی دے 80 فیصد واقعات دی بنیادی وجہ اتھاں میسر “سازگار سیاسی ماحول” تے “کریمنل ٹیرر گٹھ جوڑ” اے، بھارت دی سرپرستی اچ افغانستان دہشت گرداں دی آماجگاہ بݨ ڳئے جِتھ “وار اکانومی” چلاوݨ کیتے دہشت گردی کوں سپانسر کیتا ویندا پئے، ریاست آپݨے ہک ہک ٻال دے تحفظ کیتے پرعزم اے، خوارج دا اسلام نال کوئی تعلق کائنی اتے اللہ دے حکم دے مطابق انھاں دا فتنہ ہر صورت ختم کیتا ویسی۔ منگل کوں اتھاں پریس کانفرنس نال خطاب کریندیں ہوئیں ترجمان پاک فوج سال 2025 دی سکیورٹی صورتحال دا جامع جائزہ پیش کیتا۔ انھاں ݙسایا جو گزریل سال دہشت گردی دے 5 ہزار 397 واقعات تھئے جڈانجو سکیورٹی فورسز مجموعی طور تے 75 ہزار 175 انٹیلی جنس بیسڈ آپریشنز کیتے جنھاں دے نتیجے اچ 2 ہزار 597 دہشت گرد جہنم واصل تھئے جڈانجو 1235 سکیورٹی اہلکاراں تے شہریاں جامِ شہادت نوش کیتا۔ انھاں کارروائیاں اچ سب توں زیادہ 58,778 آپریشنز بلوچستان تے 14,658 خیبرپختونخوا اچ کیتے ڳئے۔ ڈی جی آئی ایس پی آر انکشاف کیتا جو شام توں ڈھائی ہزار غیر ملکی دہشت گرد افغانستان منتقل تھی ڳئن جدانجو امریکہ دا چھوڑیا ہویا 7.2 ارب ڈالر دا جدید اسلحہ ہݨ پاکستان دے خلاف استعمال تھیندا پئے۔ انھاں آکھیا جو افغان طالبان ٹی ٹی پی کوں آپݨی تنظیمی طرز تے تیار کریندے پئن۔ انھاں ݙو ٹوک الفاظ اچ آکھیا جو بھارت “آپریشن سندور” دے ناں تے پاکستانی شہریاں کوں نشانہ بݨاوݨ دی کوشش کیتی جیندی کالک اجاں تئیں اوندی (منہ) تے اے جبکہ “معرکہ حق” اچ بھارت دا مکھ کالا کیتا ڳیا۔ ترجمان ݙسایا جو اکتوبر 2025 اچ جݙاں افغان طالبان رجیم پاکستانی پوسٹاں تے حملے کیتے تاں پاک فوج ہارڈ میسج ݙیندے ہوئیں گھنٹیاں اچ درجناں افغان پوسٹاں کوں صفحہِ ہستی توں مٹا ݙتا۔ انھاں واضح کیتا جو گزشتہ سال دے 10 وݙے دہشت گردانہ حملیاں اچ ملوث سارے حملہ آور افغان شہری ہن تے سرحد بند کرݨ نال انھاں واقعات اچ واضح ڳھٹکی آئی اے۔ لیفٹیننٹ جنرل احمد شریف ݙسایا جو خوارج مسجداں تے گھراں اچ ٻیہہ تے آرمڈ کواڈ کاپٹرز تے ڈرونز دا استعمال کریندیں پئن اتے تریمتیں تے ٻالاں کوں انسانی ڈھال بݨیندن جڈانجو پاک فوج صرف دہشت گرداں تے انھاں دے سہولت کاراں کوں نشانہ بݨیندی اے۔ انھاں ایں بیانیے کوں مسترد کر ݙتا جو اے صرف فوج دی جنگ اے۔ انھاں آکھیا جو ایہ پاکستان دے بقاء دی جنگ اے جیڑھی طاقت نال جتی ویسی۔ ترجمان آکھیا جو نیشنل ایکشن پلان تے ساری سیاسی جماعتاں دا اتفاق اے تے ایندے تے عملدرآمد ضروری اے۔ انھاں ݙسایا جو گزشتہ پنج سالاں اچ فورسز دی استعداد کار اچ اینجھا اضافہ تھئے جو ہݨ ہک شہادت دے مقابلے اچ ݙو دہشت گرد مارے ویندے پئن۔ انھاں سوال کیتا جو جیڑھے لوک آپریشن دی مخالفت کریندن یا کابل توں سکیورٹی دی بھیک منگݨ دی ڳالھ کریندن کیا انھاں دی ذات پاکستان دی سالمیت توں وݙی اے؟