نیپال اچ مسیت تے حملے دے خلاف احتجاج، حکومت کرفیو نافذ کر ݙتا

کٹھمنڈو۔ 7 جنوری (اے پی پی) نیپال دے شہر بیرگنج اچ ہک مسجد تے ہندوواں دے حملے تے غنڈہ گردی دے بعد کرفیو نافذ کر ݙتا ڳئے۔ العربیہ دے مطابق ݙسایا ڳیا اے جو مسجد تے اے حملہ ہفتے دے چھٹی دے ویلھے کیتا ڳیا، جیندے بعد مسلماناں احتجاج کیتا۔ ایں احتجاج کوں روکݨ کیتے ہندو وی سڑکاں تے نکل آئے۔ صورتحال کوں قابو اچ رکھݨ کیتے ضلعی انتظامیہ کرفیو لاوݨ دا حکم جاری کر ݙتے۔ جیندے تحت کہیں کوں وی ڳلیاں تے سڑکاں تے نکلݨ دی موکل کائنی۔ اے وی اعلان کیتا ڳیا جو پورے ضلعے اچ احتجاج تے کٹھ (اجتماعات) تے پابندی لا ݙتی ڳئی اے۔ کرفیو کیتے جاری کیتے ڳئے حکم نامے اچ آکھیا ڳیا جو کرفیو دی خلاف ورزی کرݨ آلیاں کوں سکیورٹی فورسز گولی مار سڳسن۔ مسجد تے ہندواں ولوں حملے دے واقعے دے بعد شہر اچ احتجاج کوں روکݨ کیتے پولیس اہلکار ڳلیاں اچ گشت کریندے پئن۔ کرفیو دا اے نفاذ نیپالی دارالحکومت کٹھمنڈو توں 130 کلومیٹر پرے جنوب اچ واقع شہر بیرگنج اچ لاتا ڳئے۔ اے ضلع تیل تے ٻیاں چیزاں دی درآمد دے حوالے نال اہم اے۔ اے شہر نیپال تے بھارت وچال تجارت دے حوالے نال وی اہم اے۔