سی پیک 2.0، گرین ڈیویلپمنٹ، صنعتی تعاون تے برآمدات تے مبنی نویں دور دا آغاز

اسلام آباد۔ 7 جنوری (اے پی پی) حکومتِ پاکستان چین پاکستان اقتصادی راہداری (سی پیک) دے ݙوجھے مرحلے “سی پیک 2.0” کوں قومی معاشی ترقی، گرین انرجی تے صنعتی فروغ کیتے ہک فیصلہ کن پیش رفت قرار ݙتے۔ سی پیک 2.0 دا مقصد پہلے مرحلے دے تجربات توں سکھدے ہوئیں صنعتی تعاون، ٹیکنالوجی دی منتقلی، برآمدات اچ اضافہ تے پائیدار ترقی کوں یقینی بݨاوݨ اے۔ حکام دے مطابق حکومتی ترجیحات دے مطابق سی پیک 2.0 صرف انفراسٹرکچر تئیں محدود کائنی رہسی بلکہ خصوصی اقتصادی زونز دے ذریعے صنعت کاری، روزگار دے مواقع تے ویلیو ایڈڈ برآمدات کوں فروغ ݙیسی۔ ایں مرحلے اچ توانائی دے شعبے اچ قابلِ تجدید ذرائع، خاص طور تے شمسی، ہوائی تے آبی توانائی تے خصوصی توجہ ݙتی ویندی پئی اے تانجو باہرلے ملکوں منگوائے ونڄݨ آلے (درآمدی) ایندھن تے انحصار گھٹ تھیوے تے توانائی دا ہک مستحکم تے ماحول دوست نظام بݨایا ونڄ سڳے۔ سی پیک 2.0 دے تحت گرین ڈویلپمنٹ کوں مرکزی حیثیت حاصل اے۔ ایں حوالے نال ماحول دوست صنعتیں، توانائی دے حوالے نال موثر فیکٹریاں تے جدید ٹیکنالوجی تے مبنی منصوبے متعارف کرائے ویسن۔ ایں حکمتِ عملی نال نہ صرف پاکستان دے کاربن فٹ پرنٹ اچ کمی آسی بلکہ عالمی سرمایہ کاراں دے اعتماد اچ وی اضافہ تھیسی۔ لاجسٹکس تے علاقائی رابطے ودھاوݨ کیتے گوادر پورٹ کوں ہک اہم تجارتی مرکز دے طور تے ترقی ݙتی ویندی پئی اے، جیندے نال پاکستان، چین، وسطی ایشیا تے مشرقِ وسطیٰ وچال تجارتی پل دا کردار ادا کر سڳسی۔ ایندے نال علاقائی تجارت، ٹرانزٹ تے برآمدات اچ نمایاں اضافہ متوقع اے۔ حکومت ایں عزم دا اعادہ کیتے جو سی پیک 2.0 دے تمام منصوبے شفافیت، بہتر حکمرانی تے موثر سکیورٹی انتظامات دے تحت مکمل کیتے ویسن، بالخصوص بلوچستان سمیت سارے متعلقہ علاقیاں اچ امن و استحکام کوں یقینی بݨایا ویسی تانجو سرمایہ کاری کیتے سازگار ماحول مل سڳے۔ سی پیک 2.0 پاکستان کوں ہک درآمدی معیشت توں کڈھ تے صنعتی، برآمدات تے مبنی تے گرین اکانومی آلے پاسے گھن ونڄݨ دا جامع فریم ورک فراہم کریندے۔ حکومت پرعزم اے جو ایں منصوبے دے ثمرات ملک دے سارے صوبیاں تے عوام تئیں ہکو جیہے پڄسن، جیندے نال پائیدار ترقی تے معاشی استحکام دی نویں راہیں کھلسن۔