بنگلہ دیشی فاسٹ باؤلر مستفیض الرحمان دی آئی پی ایل توں خارج تھیوݨ دے بعد پی ایس ایل اچ شاندار واپسی

ڈھاکہ۔ 7 جنوری (اے پی پی) بنگلہ دیش دی کرکٹ ٹیم دے مایہ ناز فاسٹ بولر مستفیض الرحمان انڈین پریمیئر لیگ (آئی پی ایل) توں غیر متوقع اخراج دے بعد پاکستان سپر لیگ (پی ایس ایل) دے 11 ویں ایڈیشن اچ شمولیت اختیار کر تے ٻاہرلے ملک دی ٹاپ ٹئیر فرنچائز کرکٹ اچ ولا ڄاہ بݨا گھدی اے۔ پاکستان سپر لیگ اپݨے آفیشل سوشل میڈیا اکاؤنٹس تے مستفیض الرحمان دی شمولیت دی تصدیق کیتی تے تصویر دے نال اعلان کیتا، “بیٹرز تھی ونڄو ہوشیار، نواں دور شروع تھیندا پئے، مستفیض الرحمان شامل تھی ڳئے ہن”۔ مستفیض الرحمان دی اے پیش رفت انھاں دے آئی پی ایل توں دور تھیوݨ دے فوراً بعد سامݨے آئی، جِتھاں او کولکتہ نائٹ رائیڈرز کیتے کھیݙݨ آلے ہن۔ انھاں کوں تقریباً 9.2 کروڑ بھارتی روپے اچ حاصل کیتا ڳیا ہئی، پر پچھلے ہفتے بی سی سی آئی (BCCI) دی ہدایات تے انھاں کوں ٹیم توں کڈھ ݙتا ڳیا۔ ذرائع دے مطابق سیاسی تحفظات تے کجھ انتہا پسند گروہاں دی دھمکیاں پاروں اے فیصلہ کیتا ڳئے۔ ہݨ جݙاں آئی پی ایل اچ انھاں دا موقع نئی رہیا، پی ایس ایل انھاں کوں ویلھے سر متبادل فراہم کر ݙتے۔ پاکستان سپر لیگ دے 2026 ایڈیشن دا آغاز 26 مارچ توں 3 مئی تئیں ہوسی۔ ماہرین دے مطابق مستفیض الرحمان آپݨی آئی پی ایل دی مایوسی کوں شاندار پی ایس ایل کم بیک چ بدل سڳدن۔