اسلام آباد۔ 7 جنوری (اے پی پی) وزیر اعظم محمد شہباز شریف سٹیٹ بینک کوں ہدایت کیتی اے جو کمرشل بینکاں ولوں چھوٹے تے درمیانے پیمانے دے کاروبار تے زرعی شعبے کوں قرض دی فراہمی دے طریقہ کار کوں ٻیا سوکھا بݨاوݨ کیتے اقدامات کیتے ونڄن۔ او ٻدھ دے ݙینہہ اتھاں آپݨی صدارت اچ چھوٹے تے درمیانے پیمانے دے نویں کاروبار تے چھوٹے کساناں کوں قرض دی فراہمی اچ سہولت، …
وزیر اعظم محمد شہباز شریف دی سٹیٹ بینک کوں کمرشل بینکاں ولوں چھوٹے تے درمیانے پیمانے دے کاروبار تے زرعی شعبے کوں قرض دی فراہمی دا طریقہ کار ٻیا سوکھا بݨاوݨ کیتے اقدامات دی ہدایت
اسلام آباد۔ 7 جنوری (اے پی پی) وزیر اعظم محمد شہباز شریف سٹیٹ بینک کوں ہدایت کیتی اے جو کمرشل بینکاں ولوں چھوٹے تے درمیانے پیمانے دے کاروبار تے زرعی شعبے کوں قرض دی فراہمی دے طریقہ کار کوں ٻیا سوکھا بݨاوݨ کیتے اقدامات کیتے ونڄن۔ او ٻدھ دے ݙینہہ اتھاں آپݨی صدارت اچ چھوٹے تے درمیانے پیمانے دے نویں کاروبار تے چھوٹے کساناں کوں قرض دی فراہمی اچ سہولت، معاشی شمولیت تے نجی شعبے کوں قرض دی فراہمی تے جائزہ اجلاس نال خطاب کریندے پئے ہن۔وزیر اعظم اجلاس نال خطاب کریندیں ہوئیں ہدایت کیتی جو زراعت دے شعبے اچ جدت دے فروغ کیتے سروس پرووائیڈرز کوں ترجیحی بنیاداں تے قرض دی فراہمی یقینی بݨائی ونڄے۔ وزیر اعظم ہدایت کیتی جو معاونِ خصوصی ہارون اختر سمیڈا دی ٹیم دے ہمراہ گلگت بلتستان تے کشمیر سودھے سارے صوبیاں دا دورہ کرن تے چھوٹے تے درمیانے پیمانے دے کاروبار دی سہولت کیتے صوبیاں نال رل تے جامع پالیسی سازی کرن۔ انھاں آکھیا جو ترقی یافتہ ملکاں اچ ایس ایم ایز (SMEs) معیشت تے صنعتی شعبے اچ ریڑھ دی ہڈی دی حیثیت رکھیندن۔ انھاں نینگراں (نوجواناں) کوں انٹرپرینیورشپ دی تربیت فراہم کرݨ دی وی ہدایت کیتی تانجو نویں کاروبار شروع تھیون تے ملک دی معاشی سرگرمیاں اچ اضافہ تھیوے۔ وزیر اعظم آکھیا جو نجی شعبے بالخصوص ایس ایم ایز تے چھوٹے کساناں کوں جدید ٹیکنالوجی دے حصول کیتے قرض دی فراہمی اچ سہولت حکومت دی اولین ترجیحات اچ شامل اے۔ اجلاس کوں ݙسایا ڳیا جو کمرشل بینکاں ولوں نویں کاروبار تے جدید مشینری کیتے قرض دی فراہمی کوں ترجیح ݙیوݨ کیتے اقدامات کیتے ویندے پئے ہن، وزیر اعظم آکھیا جو او ایں حوالے نال باقاعدگی نال اجلاس دی صدارت تے نگرانی کریسن تے جلدی ایں حوالے نال ہک ذیلی کمیٹی بݨائی ویسی جیڑھی ملک اچ کاروباری سرگرمیاں اچ اضافے کیتے نجی شعبے بالخصوص ایس ایم ای سیکٹر تے زرعی شعبے کوں قرض دی فراہمی دے طریقہ کار کوں ٻیا سوکھا بݨاوݨ کیتے سفارشات تیار کریسی۔ ایں اجلاس اچ نائب وزیر اعظم و وزیر خارجہ سینیٹر محمد اسحاق ڈار، وفاقی وزیر خزانہ محمد اورنگزیب، وزیر مملکت بلال اظہر کیانی، معاون خصوصی ہارون اختر، گورنر سٹیٹ بینک جمیل احمد تے متعلقہ اعلیٰ حکام دے نال نال گلگت بلتستان تے آزاد جموں و کشمیر سمیت چاریں صوبیاں دے چیف سیکریٹریز شرکت کیتی۔
