جڳ مشہورسرائیکی شاعرامان اللہ ارشد جہان فانی توں جھوک لݙا ڳئن

اسلام آباد۔7جنوری (اے پی پی سرائیکی نیوز) وسیب دے مُہاندرے جڳ مشہور سرائیکی شاعر امان اللہ ارشد طویل علالت دے بعد جہان فانی توں جھوک لݙا ڳئن۔او دل تے شوگر دے عارضے وچ وݙے عرصے توں مبتلا ہن۔ امان اللہ ارشدؔ 1971ء اچ دیرہ دوست محمد کھائی خیر شاہ (ظاہر پیر) تحصیل خانپور، ضلع رحیم یار خان اچ ڄمیے۔ انہاں  صوفی فیض محمد دلچسپ دی شاگردی اختیار کیتی جنہاں دی صحبت انھاں دے فن کوں روحانی گہرائی عطا کیتی۔ انہاں دھرتی دے ݙکھ اتے انسانی محرومیاں کوں بھرپور اتے سچائی دے نال بیان کیتا ، مگر انھاں دی اصل سنڄاݨ عشقِ رسول ﷺ ہی بݨی رہی۔ انھاں دی نمایاں تصانیف اچ،” اکھیں خواب جگارے”، “ارشد دے ݙوہڑے”، “سک دا ساوݨ”، “دھمال”، “تیڈیاں یاداں”، “آسرا فقیریں دا”، “الہام دی بارش(نعتیہ مجموعہ)”۔ انہاں دے نعتیہ مجموعے کو سیرت النبی ایوارڈ سودھے ٻہوں سارے اعزازات ملیے۔انہاں دی نماز جنازہ انہاں دے آبائی علاقے دیرہ دوست محمد (کھائی خیر شاہ) ظاہر پیر تحصیل خان پور ضلع رحیم یارخان اچ اڄ شام 7 جنوری 2026 کوں 5 وڄے ادا کرݙتی ڳئی اے۔انہاں دی نماز جنازہ اچ وسیب سودھے،سماجی، ادبی ،سیاسی شخصیات وݙی تعداد اچ شرکت کیتی۔جئیں توں بعد انہاں کوں آبائی قبرستان اچ سپرد خاک کرݙتا ڳیا۔