قومی تعلیمی یکجہتی دا تاریخی سنگِ میل، 38 ویں بین الصوبائی وزراء کانفرنس وچ ’’نیشنل ایجوکیشن ایکشن پلان‘‘ دی متفقہ منظوری

اسلام آباد۔ 7 جنوری (اے پی پی) وفاقی وزیر تعلیم و پیشہ وارانہ تربیت خالد مقبول صدیقی دی صدارت وچ تھئی 38 ویں بین الصوبائی وزراء تعلیم کانفرنس لمبی مشاورت دے بعد “نیشنل ایجوکیشن ایمرجنسی ایکشن پلان” تے ٻئے تعلیمی منصوبیں دی متفقہ منظوری ݙے ݙتی اے۔وزراء کانفرنس وچ وزیرِمملکت وجیہہ قمر، وفاقی پارلیمانی سیکرٹری فرح ناز اکبر، سیکرٹری تعلیم ندیم محبوب، بلوچستان دی وزیر راحیلہ حمید درانی، سندھ دے وزیر محمد اسماعیل راہو، پنجاب دے وزیرِ تعلیم رانا اقبال سکندر تے کے پی دے وزیرِ تعلیم ارشد ایوب خان (ویڈیو لنک دے ذریعے) سودھے ٻئے اعلیٰ حکام شریک تھئے۔ اجلاس دے دوران سکول توں ٻاہر (آؤٹ آف سکول) ٻالاں کوں تعلیم دے آلے پاسے واپس گھن آوݨ کیتے وفاق دی سطح تے ہک خاص “چیلنج فنڈ” دے بارے وی ݙسایا ڳیا، جیندے ذریعے وفاقی حکومت سارے صوبیں کوں ایں قومی مسئلے نال نبݨݨ کیتے مدد کریسی۔ ایں تاریخی موقع تے ساری وفاقی اکائیاں سیاسی وابستگیاں توں انڄ تھی تے تعلیمی ایمرجنسی لاوݨ تے اتفاق کیتا۔پنجاب دے وزیرِ تعلیم رانا سکندر کانفرنس کوں ݙسایا جو صوبے وچ 1.8 ملین گھوسٹ ٻالاں دا خاتمہ تے 10 ہزار سکولاں دی آؤٹ سورسنگ کیتی ڳئی اے۔ سندھ دے وزیر محمد اسماعیل راہو ݙسایا جو 93 ہزار اساتذہ دی میرٹ تے بھرتی مکمل تھی چکی اے۔ بلوچستان دی وزیر راحیلہ حمید درانی ݙسایا جو صوبے 3200 بند سکول بحال کر تے 1 لکھ 40 ہزار ٻالاں کوں تعلیمی دھارے وچ شامل کیتے۔ خیبر پختونخوا دی وزارتِ تعلیم 10 ہزار اساتذہ دی بھرتی تے انرولمنٹ وچ 6 فیصد اضافے دی تصدیق کیتی۔ آزاد کشمیر دے وزیر ملک ظفر ݙسایا جو ایل او سی دے چیلنجز دے باوجود 10 ہزار نویں کلاس رومز کیتے 7 ارب روپے مختص کیتے ڳئن۔وفاقی وزیر خالد مقبول صدیقی آکھیا جو غیر رسمی تعلیم،پرے دے علاقیں تئیں رسائی تے مدرسیں دے طالبِ علماں کوں قومی دھارے وچ گھن آوݨ اساݙی پہلی ترجیح اے تے اساں سارے رل تے وسائل دی کمی کوں مکیسوں