حکومت نینگراں کوں بااختیار بݨاوݨ تے طلبہ کیتے تعلیمی وظیفے مزید ودھا ݙتن ، وفاقی وزیر سید عمران احمد شاہ

راولپنڈی۔ 7 جنوری (اے پی پی) وفاقی وزیر تخفیفِ غربت و سماجی تحفظ سید عمران احمد شاہ آکھیے جو وزیراعظم میاں شہباز شریف دے وژن دے تحت حکومت نینگراں کوں بااختیار بݨاوݨ تے طلبہ کیتے تعلیمی وظیفیں (اسکالرشپس) وچ مزید ودھارا کیتے ۔ حکومت تعلیم تئیں برابر دی رسائی یقینی بݨاوݨ کیتے پرعزم اے تے پاکستان بیت المال اسکالرشپ جیھے پروگراماں دے ذریعے لائق تے غریب نینگراں کیتے رستے دیاں رکاوٹاں دور کریندی پئی اے۔اے ڳالھ انہاں پیر مہر علی شاہ بارانی زرعی یونیورسٹی راولپنڈی وچ پاکستان بیت المال دے اسکالرشپ حاصل کرݨ آلے طلبہ دے اعزاز وچ تھئی تقریب نال خطاب کریندے آکھی۔ وفاقی وزیر سید عمران احمد شاہ آکھیا جو نینگر اساݙا قیمتی اثاثہ ہن، کوئی وی طالبِ علم مالی مجبوری پاروں تعلیم توں محروم نہ رہے۔ انھاں بارانی یونیورسٹی دے طلبہ کیتے ہک خاص اعلان کیتا جو انھاں کیتے اسکالرشپ دی کوئی حد مقرر نہ تھیسی، اتے ہر مستحق درخواست تے غور کیتا ویسی۔انھاں مزید ݙسایا جو طلبہ دے سالانہ وظیفے دی رقم ہک لکھ روپے توں ودھا تے ݙڈھ لکھ روپے کر ݙتی ڳئی اے۔ وفاقی وزیر طلبہ کوں نصیحت کیتی جو او سوشل میڈیا دا استعمال علم حاصل کرݨ کیتے کرن، شور مچاوݨ کیتے نہ۔ تقریب دے چھیکڑ وچ وفاقی وزیر تے وائس چانسلر مستحق طلبہ وچ اسکالرشپ دے چیک ونڈئے