برآمدات تے مبنی ترقیاتی اہداف دا حصول اساݙی ترجیح اے، وزیراعظم محمد شہباز شریف

اسلام آباد۔ 7 جنوری (اے پی پی) وزیراعظم محمد شہباز شریف برآمدات  بالخصوص زرعی برآمدات وچ ودھارے تے تجارتی خسارے وچ کمی کیتے لائحہ عمل تیار کرݨ دی ہدایت کریندے آکھیے جو برآمدات تے مبنی ترقیاتی اہداف دا حصول اساݙی ترجیح اے، برآمد کنندگان کوں سہولتاں ݙیوݨ دے حوالے نال ادارہ جاتی اصلاحات تے کم تکھا کیتا ونڄے، برآمد کنندگان کوں ٹیکس ری فنڈ دے حوالے نال کوئی کوتاہی قبول کائنی۔ وزیراعظم دفتر دے میڈیا ونگ توں جاری بیان موجب انھاں اے ڳالھ ملکی برآمدات وچ ودھارے متعلق جائزہ اجلاس دی صدارت کریندے آکھی۔ اجلاس وچ وفاقی وزیر خزانہ محمد اورنگزیب، وفاقی وزیر رانا تنویر حسین، وفاقی وزیر اطلاعات عطاء اللہ تارڑ، وزیر مملکت بلال اظہر کیانی، گورنر سٹیٹ بینک جمیل احمد تے ٻئے اعلیٰ افسراں شرکت کیتی۔وزیراعظم ہدایت کیتی جو چاول دی برآمدات وچ ودھارے دے حوالے نال رائس ایکسپورٹرز ایسوسی ایشن دے نال رل تے حکمتِ عملی ترتیب ݙتی ونڄے، برآمد کنندگان کوں سہولتاں ݙیوݨ کیتے ادارہ جاتی اصلاحات تے کم تکھا کیتا ونڄے، برآمد کنندگان کوں ٹیکس ری فنڈ دے حوالے نال کوئی کوتاہی قابلِ قبول کائنی۔ اجلاس کوں برآمدات وچ ودھارے متعلق حکومتی حکمتِ عملی تے بریفنگ ݙتی ڳئی تے جولائی توں دسمبر 2025ء تئیں دے تجارتی اعداد و شمار پیش کیتے ڳئے۔ اجلاس کوں ہائی ویلیو سیکٹرز انجینئرنگ، دوائیں، میڈیکل ڈیوائسز تے پراسیسڈ فوڈ دی برآمدات ودھاوݨ دے بارے ݙسایا ڳیا۔ اجلاس کوں ݙسایا ڳیا جو ملکی برآمدات کوں گلوبل ویلیو چین دا حصہ بݨاوݨ کیتے وی کم تھیندا پئے، برآمد کنندگان کوں سہولت ݙیوݨ کیتے ملک وچ پورٹس تے لاجسٹکس دے نظام وچ بہتری گھن آئی ویندی پئی اے تے چاول دی برآمدات کیتے کئی ملکاں نال گورنمنٹ ٹو گورنمنٹ (G2G) معاہدیں تے ڳالھ مہاڑ جاری اے۔