بلوچستان کوں پیش آندے سکیورٹی، معاشی تے ترقیاتی چیلنجز نال نبݨݨ کیتے رل ٻہہ تے کم کریسوں، وزیراعظم محمد شہباز شریف دی سیاسی رہنماواں نال ڳالھ مہاڑ

کوئٹہ۔ 8 جنوری (اے پی پی) وزیراعظم محمد شہباز شریف دہشت گردی مکاوݨ، بلوچستان دی ترقی تے قومی یکجہتی تے زور ݙیندے آکھیے جو بلوچستان جغرافیائی لحاظ نال پاکستان دا ساریں توں وݙا صوبہ اے، صوبے کوں درپیش سکیورٹی، معاشی تے ترقیاتی چیلنجز نال نبݨݨ کیتے وفاق تے صوبے کوں رل تے اڳوں ودھݨا ہوسی ۔ افواجِ پاکستان تے سکیورٹی اداریں دی قربانیاں پاروں ملک دا دفاع مضبوط تھئے، این ایف سی ایوارڈ، وݙے ترقیاتی منصوبے، دانش سکولز تے زرعی اصلاحات دے ذریعے رل ٻہہ تے اتحاد واتفاق نال بلوچستان کوں ترقی دے قومی دھارے وچ شامل کیتا ویندا پئے۔اے ڳالھ انہاں انھاں کوئٹہ وچ سیاسی رہنماواں نال ڳالھ مہاڑ کریندے آکھی۔ ایں موقع تے گورنر بلوچستان شیخ جعفر خان مندوخیل، وزیراعلیٰ میر سرفراز احمد بگٹی، سپیکر قومی اسمبلی سردار ایاز صادق، نائب وزیراعظم اسحاق ڈار تے ٻئے رہنما وی موجود ہن۔ وزیراعظم آکھیا جو خیبر پختونخوا وانڳوں بلوچستان وی دہشت گردی توں شدید متاثر تھئے، فتنہ الخوارج دے خلاف جنگ جاری اے تے دہشت گردی دے منڈھوں خاتمے تئیں آرام نال نہ ٻہسوں۔انھاں آکھیا جو فیلڈ مارشل سید عاصم منیر تے افواجِ پاکستان دلجمعی نال دہشت گردی دے خلاف جنگ دی قیادت کریندے پئن۔ وزیراعظم این ایف سی ایوارڈ دا حوالہ ݙیندے آکھیا جو 2010 وچ پنجاب اپݨے حصے وچوں سالانہ 11 ارب روپے بلوچستان کوں ݙتے ہن۔ انھاں آکھیا جو کوئٹہ کراچی شاہراہ دا سنگِ بنیاد رکھیا ویندا پئے جیندے نال حادثے گھٹ تھیسن۔ بلوچستان وچ کٹھے پنج دانش سکولز بݨائے ویندے پئن جِتھاں غریب ٻال معیاری تعلیم حاصل کریسن۔ انھاں آکھیا جو نواز شریف ہمیشہ بلوچستان دی ترقی وچ دلچسپی ڳھدی اے۔