پاکستان کشمیری عوام دی منصفانہ جدوجہد وچ اخلاقی، سیاسی تے سفارتی حمایت جاری رکھیسی، ترجمان دفتر خارجہ طاہر حسین اندرابی دی پریس بریفنگ

اسلام آباد۔ 8 جنوری (اے پی پی) پاکستان ہک واری ول اپݨے ایں پراݨے موقف کوں دہرائے جو او کشمیری عوام دی حقِ خود ارادیت سانڳے منصفانہ جدوجہد وچ انھاں دی غیر متزلزل اخلاقی، سیاسی تے سفارتی حمایت جاری رکھیسی۔ ترجمان دفترِ خارجہ طاہر حسین اندرابی ہفتہ وار پریس بریفنگ وچ آکھیا جو 5 جنوری کوں پاکستان دے عوام جموں و کشمیر دے عوام نال رل تے یومِ حقِ خود ارادیت منایا۔انھاں آکھیا جو اے ݙینھ 1949ء وچ اقوامِ متحدہ دی اوں قرارداد دی یاد ݙویندے جیندے وچ کشمیری عوام دے ایں حق کوں منیا ڳیا ہئی جو او اقوامِ متحدہ دی نگرانی وچ ہک آزاد تے منصفانہ استصوابِ رائے دے ذریعے اپݨے مستقبل دا فیصلہ کرن۔ ترجمان آکھیا جو کشمیری عوام پچھلے ست ݙہاکیں توں بھارت دی طرفوں ایں حق توں محروم رکھیے ویندے پئن۔ انھاں آکھیا جو بھارت کشمیری قیادت کوں چُپ کراوݨ تے میڈیا کوں دٻاوݨ دیاں کوششاں کریندا پئے، بے گناہ کشمیریاں دی گرفتاریاں تے “سرچ آپریشنز” مقبوضہ علاقے وچ معمول بݨ چکئن۔ مسرت عالم، شبیر احمد شاہ، آسیہ اندرابی تے ٻئے کئی رہنما سالاں توں قید وچ ہن۔ انھاں آکھیا جو 5 اگست 2019ء دے بھارتی اقدامات بین الاقوامی قانون دی خلاف ورزی ہن۔ پاکستان کشمیریاں دے نال کھڑے تے انھاں دی حمایت جاری رکھیسی۔