پاکستان تے چین دا افغانستان وچ موجود ساری دہشت گرد تنظیماں کوں ختم کرݨ کیتے مزید واضح تے قابلِ تصدیق اقدامات تے زور، ترجمان دفتر خارجہ طاہر حسین اندرابی دی پریس بریفنگ

اسلام آباد۔ 8 جنوری (اے پی پی) ترجمان دفتر خارجہ طاہر حسین اندرابی آکھیے جو پاکستان تے چین افغانستان وچ موجود سارے دہشت گرد تنظیماں کوں ختم کرݨ کیتے مزید واضح تے قابلِ تصدیق اقدامات تے زور ݙتے، ݙوہیں ملکاں اپݨے ترقیاتی منصوبیں تے ترجیحات کوں مزید ہک ٻئے موجب بݨاوݨ تے چین پاکستان اقتصادی راہداری (سی پیک) کوں اڳوں ودھاوݨ تے وی اتفاق کیتے۔ ہفتہ وار پریس بریفنگ وچ ترجمان آکھیا جو ایں ہفتے نائب وزیراعظم تے وزیر خارجہ سینیٹر محمد اسحاق ڈار بیجنگ وچ تھئی پاک چین وزرائے خارجہ دے سٹریٹجک ڈائیلاگ دے ستویں دور وچ شرکت کیتے چین دا دورہ کیتا۔ انھاں آکھیا جو ایں موقع تے جاری تھیوݨ آلا پاک چین مشترکہ اعلامیہ ہک مکمل دستاویز اے جیندے وچ دفاع، سلامتی، معیشت، تجارت تے عوامی رابطیں سودھے  سارے پہلوواں تے ڳالھ مہاڑ کیتی ڳئی۔ترجمان ݙسایا جو پاکستان “ون چائنا” اصول تے اپݨے پکے عزم کوں دہرایا تے آکھیے جو تائیوان چین دا ہک ایجھا حصہ اے جینکوں انڄ کائنی کیتا ونڄ سڳدا۔ چین وی پاکستان دی خودمختاری تے علاقائی سالمیت دی حمایت دا اعادہ کیتے تے دہشت گردی دے خلاف پاکستان دیاں قربانیاں کوں تسلیم کیتے۔ ݙوہیں فریقاں سی پیک دے اپ گریڈ شدہ ورژن 2.0 دی تعمیر تے وی اتفاق کیتے۔انھاں آکھیا جو ݙوہیں ملکاں جنوبی ایشیا وچ امن و استحکام برقرار رکھݨ تے سارے مسئلیں کوں ڳالھ مہاڑ نال حل کرݨ دی ضرورت تے زور ݙتے۔ پاکستان چین کوں جموں و کشمیر دی صورتحال توں آگاہ کیتا، جیندے تے چین آکھیا جو کشمیر دا مسئلہ اقوامِ متحدہ دے چارٹر تے سلامتی کونسل دی قرارداداں موجب حل تھیوݨا چاہیدے۔ ترجمان مزید آکھیا جو ݙوہیں ملکاں افغانستان دے مسئلے تے نیڑے رابطہ رکھݨ تے اتفاق کیتے تے ایں ڳالھ تے زور ݙتے جو افغانستان دی سرزمین کہیں ٻئے ملک دے خلاف دہشت گردی کیتے استعمال نی تھیوݨی چاہیدی، اے چیز علاقائی تے عالمی سلامتی کیتے ٻہوں وݙا خطرہ اے۔